Þröllinn bloggar

Jæja, mannorði mínu er bjargað, ég var efstur í spáleik eurovision partýsins á laugardaginn. Stigin voru reiknuð þannig að ef menn hittu á rétt sæti voru gefin 0 stig og svo 1 stig fyrir hverju sæti sem munaði þannig að ef einhver spáði lagi í 5. sæti sem svo endaði í 12. sæti þá fékk viðkomandi 7 stig fyrir það. Best er sem sagt að vera með sem fæst stig. Svona endaði keppnin.

Stigakeppni partýsins endaði svo með sigri Serbíu. Svona var stigagjöfin okkar:

• Skrifa athugasemd... (0)

Jæja, eru ekki allir komnir í gírinn??? Get sjálfur ekki neitað því að spennan er aðeins farin að byggjast upp Nú ætla ég að analýsera lögin sem verða spiluð í fyrsta sinn í kvöld og koma svo með aðrar hugleiðingar um kvöldið og spá.

Spánn
Daniel Diges stígur annar á svið í kvöld fyrir hönd Spánverja, beint á eftir Azerbaijan. Ég verð að játa að ég er engan veginn að fíla þennan söngleikjavals þeirra Spánverja en einhverjir euronördarnir eru engu að síður að spá þessu í toppbaráttunni. Hann er víst búinn að standa sig mjög vel á æfingum en ég get engu að síður ómögulega séð þetta fyrir mér fyrir ofan miðju.

Noregur
Norðmenn tefla fram sænskri Josh Groban wannabe kraftballöðu með hinum sykraða Didrik Solli-Tangen. Þetta er í grunninn alveg allt í lagi en samt aðeins of mikil formúla fyrir minn smekk. En það er ýmislegt að þessu. Didrik hefur átt í miklum erfiðleikum með að ná djúpu tónunum og í norsku undankeppninni var hann bara verulega falskur. Þess utan eru töluvert betri ballöður með meira heillandi flytjendum, þar fara helst ísraelska ballaðan og sú írska. Auk þess er ekki gott að vera svona snemma í röðinni með svona ballöður, Norðmenn eru þriðju á svið. Ég á því ekki von á því að Norðmenn þurfi að hafa áhyggjur af því að þurfa að halda þetta annað árið í röð og þetta kemur væntanlega til með að enda um einhvers staðar í miðjubaráttunni.

Bretland
Engin þjóð hefur lagt minni metnað í keppnina undanfarin ár en Bretar. Þeir bættu sig þó aðeins í fyrra þegar þeir fengu sjálfan Andrew Lloyd Webber til að semja lagið fyrir sig og það skilaði þeim í fimmta sætið. Nú eru þeir aftur dottnir í sama ruslið, fengu einhverja útbrunna lagahöfunda sem hafa ekki átt smell síðan á 9. áratugnum til að semja einhverja útþynnta eitís ballöðu og fengu svo einhvern strákling á tvítugsaldri til að syngja. Josh heitir flytjandinn og er svo greinilega ekki vanur því að standa á sviði því hann er svo skíthræddur við myndavélarnar að hann langar mest til að hverfa. Út kemur bara glatað atriði sem ég get ekki ímyndað mér að nokkur maður kjósi. Ég ætla því að spá Bretum botnsætinu í ár.

Frakkland
Það verður alla veganna ekki af Frökkum tekið að þeir eru í stuði. Jessy Matador heitir flytjandinn og er ættaður frá Kongó, einhver sagði eftir að hafa séð Jessy á æfingum að Frökkum hefði tekist að finna eina taktlausa blökkumanninn í öllu Frakklandi en æfingarnar gengu víst mjög illa til að byrja með en hafa víst farið skánandi eftir það en ekki tekist fullkomlega upp enn þá. Ef þetta lag ætlar að eiga einhvern séns til að komast í topp 10 þá þarf allt að ganga 100% á lokakvöldinu. Ég á von á því að þetta verði í neðri hlutanum í kvöld.

Þýskaland
Þjóðverjar héldu risaforkeppni í mörgum þáttum sem minnti á laugardagslögin okkar hérna um árið. Unser Star für Oslo kölluðu þeir forkeppnina sína og það var hin 18 ára gamla Lena Meyer-Landrut sem bar sigur úr býtum. Lena sem nú er nýorðin 19 syngur lagið Satellite en mörgum þykir það minna svolítið á Jungledrum lagið hennar Emilíönu Torrini. Þetta virðist ætla að verða svona love or hate lagið í ár, annaðhvort fíla menn það eða þola það ekki. Veðbankarnir hafa verið nokkuð hrifnir af þessu lagi og hafa haft það í öðru sæti á eftir Azerbaijan nánast frá upphafi. Ég er ekki að sjá það enda svo ofarlega en það á örugglega eftir að verða efst af þeim lögum sem þurftu ekki að taka þátt í forkeppninni. Ég spái því í topp 10.

Drátturinn fór heldur illa með sigurlíkur Azera en þeir stíga fyrstir á svið í kvöld. Frammistaða þeirra var heldur ekki að slá í gegn í forkeppninni en henni gekk víst miklu betur á æfingunni í gær sem er frammistaðan sem dómnefndirnar dæma út frá. Ég á því enn þá von á því að Azerbaijan verði ofarlega en ég spái þeim ekki lengur sigri.

Armenar vöktu vissulega athygli í forkeppninni fyrir skemmtilega brjóstaskoru og fjörugt atriði. Sjálfur hefði ég reyndar kosið að Eva Rivas væri aðeins rólegri á sviðinu og einbeitti sér að söngnum og að sýna brjóstin en það verður ekki á allt kosið. Armenar fengu góðan drátt og verða 21. á sviðið í kvöld. Ég ætla að spá Armenum sigri í keppninni í ár. Armenum hefur alltaf gengið vel frá því þeir hófu að taka þátt árið 2006 þrátt fyrir að vera jafnvel með miklu verri lög og aldrei endað neðar en 10. sæti sem þeir lentu í í fyrra. Armenar geta bæði treyst á Sovíetblokkina með atkvæði og innflytjandur í Vestur-Evrópu. Ég tippa því á að tími Armena sé kominn.

Íslendingar þykja ekki alveg jafnheppnir með dráttinn. Þó það sé í raun allt í lagi að vera númer 16 þá erum við beint á eftir Albaníu sem er með frekar svipað lag. Það þykir víst ekki vænlegt til árangurs. Aftur á móti kemur Úkraína beint á eftir okkur og betri kontrast er sennilega ekki hægt að fá en það.

Danir fengu draumadráttinn, eru síðastir á svið á eftir tveimur rólegum ballöðum. Dönum gekk líka vel á æfingu í gær og hver veit nema þeir toppi bara á réttum tíma. Ég er samt ekki viss um að það dugi Dönum í toppbaráttuna

Gaman að segja frá því að Svíar stóðu að baki 6 lögum í keppninni í ár, Azerbaijan, Noregur, Danmörk, Írland og Georgía komust öll áfram með sænska lagahöfunda en Svíar sitja eftir með sárt ennið. Til að nudda salti í sárin þá sendu lagahöfundarnir sem sömdu danska lagið það lag fyrst í sænsku forkeppnina en það þótti ekki nógu gott fyrir hana. Þeir fóru þá með lagið sitt til Danmerkur og sigruðu keppnina þar og eru komnir með lagið í úrslitin.

Spá mína fyrir kvöldið ætla ég að setja svona:
1. Armenía
2. Azerbaijan
3. Ísrael
4. Belgía
5. Rúmenía
6. Serbía
7. Grikkland
8. Þýskaland
9. Írland
10. Rússland
11. Tyrkland
12. Ísland
13. Noregur
14. Moldavía
15. Danmörk
16. Frakkland
17. Georgía
18. Albanía
19. Spánn
20. Bosnía & Herzegóvína
21. Kýpur
22. Úkraína
23. Portúgal
24. Hvíta-Rússland
25. Bretland

Ég vil þó taka fram að keppnin í ár er alveg galopin og ég get sé sigurvegarnn koma úr einhverju af 9 efstu lögunum. Mér hefur aldrei fundist jafnerfitt með að greina keppnina eins og í ár.

• Skrifa athugasemd... (0)

Ég játa glataðan árangur í spánni minni, 7 af 10 rétt, það er frekar slakt

• Skrifa athugasemd... (2)

Litháen
Litháen hefur aldrei gengið betur en þegar þeir sendu flippatriði árið 2006, We Are The Winners endaði í sjötta sæti en síðan þá hefur þeim gengið illa og aðeins einu sinni komist upp úr forkeppninni en enduðu þá í 23. sæti í aðalkeppninni. Þeir fara því aftur í sprellið núna og syngja lagið East European Funk. Nú fara þeir jafnvel enn lengra með sprellið en síðast og enda atriðið á silfruðum pallíettu nærbuxum. Það er alltaf erfitt að spá hvernig svona flippatriðum er tekið en ég mundi segja að þetta lag eigi svona 50/50 séns á að fara áfram.

Armenía
Flott gella að syngja ágætislag með ógurlega stórt og mikið atriði, með fullt af eldi og flugeldum. Svo hjálpar það Armenum að það er mikið af Armenum sem búa utan heimalandsins. Hún hefur verið pínulítið shaky á æfingunum en það breytir því ekki að þetta er alveg 100% öruggt að fara áfram og ef hún syngur þetta vel þá á þetta pottþétt eftir að vera í toppbaráttunni.

Ísrael
Ísrael býður klárlega upp á gæsahúðaratriðið í ár. Rosalega falleg og kröftug ballaða, full af dramatík og vonandi vel flutt. Performansinn er látlaus eins og við á í svona lögum. Þetta er uppáhaldslagið mitt í ár og það er alveg að fljúga í gegnum þessa forkeppni og kemur áreiðanlega til með að enda í topp 10 í aðalkeppninni.

Danmörk
Danir voru fyrirfram taldir með eitt sigurstranglegasta lagið og þótti pottþétt að þeir væru að fara áfram. Æfingarnar hafa hins vegar gengið mjög illa hjá þeim og þau (og þá sérstaklega hann) hafa verið fölsk og vantað allt kemestrí á milli þeirra. Vindvélin er þó enn á sínum stað og stillt í botn. Eurovision nördarnir eru eitthvað skeptískir á að þetta eigi eftir að batna nóg til að komast áfram en mér finnst nú líklegra en ekki að þetta muni fara upp úr forkeppninni en ég er ekki að sjá það gera neinar rósir í aðalkeppninni. Eins og Hvítrússar sýndu nú í gær þá er allt í lagi að vera pínu falskur.

Sviss
Menn segja að Sviss sé það lag sem hafi versnað mest við það að fara á svið. Flytjandinn Michael von der Heide er ekki beint sá myndarlegasti og honum hefur ekki gengið neitt sérstkalega á æfingunum og bakraddasöngkonurnar víst verið alveg út úr kortinu. Auk þess er lagið frekar sviplaust og dapurt og svo vantar Sviss allar vinaþjóðir til að bjarga sér. Ég er því ekki að sjá Sviss komast áfram.

Svíþjóð
Svíþjóð stólar á krúttatkvæðin. Hin 19 ára Anna Bergendahl er afskaplega sæt á sviðinu með gítarinn sinn og hefur einhvern sjarma sem ég hugsa að ýmsir eigi eftir að falla fyrir. Æfingar hafa gengið vel og Anna er búin að vera solid á æfingunum. Þetta á alveg eftir að fljúga inn í úrslitin.

Azerbaijan
Azerbaijan er það land sem sennilega hefur tjaldað mestu til fyrir keppnina í ár. Safura er búin að ferðast um alla Evrópu til að kynna lagið sitt og til stóð að hún kæmi til Íslands en gosið í Eyjafjallajökli varð til þess að hún hætti við það. Þó að manni finnist það stundum full desperate þegar lönd leggja svona mikið í keppnina þá virðist það ansi oft skila árangri eins og dæmin sanna með Úkraínu 2004 og Rússland 2008. Safura hefur sett upp metnaðarfulla heimasíðu á slóðinni http://safura.eurovisiontalents.com sem meira að segja hefur verið þýdd á íslensku. Þó að ég sé ekki að fíla þetta lag neitt sérstaklega þá held ég að þetta sé sterkur sigurkandídat. Það byggi ég á eftirfarandi röksemdafærslu, keppnin er mjög jöfn í ár þar sem ekkert lag sker sig neitt áberandi úr eins og Noregur gerði í fyrra. Þá vega kosningablokkirnar þyngra á metunum og Sovíetblokkin er sú stærsta en þar hafa atkvæðin yfirleitt farið til Rússlands og Úkraínu. þar sem Rússar og Úkraínumenn eru ekki með neitt sérstök lög í ár finnst mér líklegt að Azerbaijan og Armenar munu fá nokkuð stóran hluta af þeim atkvæðum. Svo eru þessar þjóðir líka með innflytjandur dreifða um alla Evrópu þannig að stig frá Hollandi, Blegíu, Frakkalandi og fleiri vestur-Evrópuþjóðum kæmi ekki á óvart.

Úkraína
Þetta lag er bara leiðinlegt og alveg ótrúlegt að eftir þrjár undankeppnir í Úkraínu hafi þetta verið það besta sem þeir gátu fundið. Þó að Úkraína hafi alltaf komist áfram úr forkeppninni þá get ég bara ómögulega séð það að þetta geti komist áfram.

Holland
Hollendingar senda elstu 17 ára stelpu í heimi með lag sem hljómar eins og það sé frá 1965 og samið af Geirmundi Valtýssyni. Einfaldlega skelfilegt lag ef maður er orðinn eldri en sex ára og á ekki séns að komast áfram.

Rúmenía
Þetta verður væntanlega stuðlagið á euroklúbbunum eftir keppnina. Fínt stuð lag og flott gimmikk að vera með tvöfalt píanó á sviðinu. Söngkonan, Paula, er búin að vera eitthvað óákveðin með hvaða dressi hún eigi að vera í á sviðinu, á síðustu æfingu var hún í einhverjum ógurlegum silfurslimgalla en í dag var hún búin að skipta yfir í eitthvað einfaldara og látlausara. Þetta lag á eftir að fljúga í gegnum forkeppnina og mjög líklega eftir að enda í topp 10.

Slóvenía
Hvað gerist þegar maður blandar saman iðnaðarrokkara frá 1987 og balkanskri þjóðlagamúsík? Katastrófa!!! Þetta er eitt allra versta atriði sem hefur verið sent í eurovision frá upphafi og það breytir engu þó að stelpan sé voðalega sæt og í flottum þjóðbúning. Þetta er bara viðbjóður.

Írland
Írar senda gamla eurovision hetju, Niamh Kavanagh sigraði keppnina árið 1993 með lagið In Your Eyes. Það var eitt versta sigurlag allra tíma og hún virkaði fertug þá þrátt fyrir að vera aðeins 25 ára. Nú er hún orðin fertug og tveimur árum betur og lítur bara betur út en hún gerði 1993 og lagið er bara fín írsk ballaða og á eftir að fljúga inn í úrslitin. Ekki skemmir það nú fyrir Írunum að koma beint á eftir Slóvenunum og Írar þurfa ekki að hafa neinar áhyggjur af flutningnum þar sem Niamh er frábær söngkona og á alveg örugglega eftir að gera þetta vel.

Búlgaría
Þetta lag er að gera nákvæmlega ekkert fyrir mig. Það er einhvern veginn hvorki fugl né fiskur, það er ekki gott danslag, það er ekki gott popplag og ekki góð ballaða. Miro á þó örugglega eftir að syngja þetta ágætlega en fyrir mína parta er hann einum of ánægður með sjálfan sig og atriðið er svolítið mikið over the top. Ég sé þetta lag ekki komast áfram þó ég geti ekki alveg útilokað það þá held ég að þetta lag muni sitja eftir og Miro á eftir að fara í brjálaða fýlu.

Kýpur
Kýpverjar tefla fram Wales-verjanum Jon Lilygreen og hljómsveitinni The Islanders sem samanstendur af þremur Bretum, Kýpverja og norskri stelpu. Þetta gæti hjálpað til við að vega upp á móti því að Grikkir sem gefa Kýpverjum alltaf 12 stig þegar þeir geta kepptu í fyrri forkeppninni og ætti að geta hjálpað eitthvað til með stigasöfnun. Þetta lag ætti nú að höfða til sama fólks og belgíska lagið í fyrri forkeppninni þó það sé nú ekki alveg jafngott. Það að auki held ég að það sé of mikið af öðrum ágætum ballöðum, eins og sænska, ísraelska og írska lagið. Mér finnst því ólíklegt að þetta lag fari áfram en það á þó smá séns.

Króatía
Króatar tefla fram stelpusveitinni Feminnem sem keppti fyrir Bosníu árið 2005 með slökum Abba slagara. Nú eru þeir með betra lag en 2005 en eitthvað hafa æfingarnar gengið misvel og eitthvað verið um falska tóna. Mér finnst lagið byrja vel en þegar líður á það finnst mér það versna og endar eiginlega með því að þær garga hver í kapp við aðra og það sem á að vera hápunkturinn í laginu endar eiginlega bara í einhverjum hávaða. Þetta lag er samt pottþétt að fara áfram og gæti orðið með í toppbaráttunni en það fær ekki mitt atkvæði.

Georgía
Georgíumenn hafa keppt tvisvar ef við teljum ekki með árið í fyrra þegar þeir máttu ekki vera með með lagið We Don’t Wanna Put In. Bæði skiptin komust þeir áfram og enduðu svon í 11. og 12. sæti. Í ár tefla þeir fram ballöðu sem gæti týnst svolítið í ballöðuflóðinu í þessari forkeppni. Þeir eiga þó ágætan séns á að komast áfram en engan veginn öruggt.

Tyrkland
Tyrkir komast alltaf áfram. Oftast eru þeir reyndar með ágæt lög líka og svo er einnig í ár. Þeir eiga því eftir að fljúga í gegn en ég efast um að þetta sé að fara að gera einhverjar rósir í aðalkeppninni.

Lögin tíu sem ég held að komist áfram úr þessari keppni eru því:

Armenía
Ísrael
Danmörk
Svíþjóð
Azerbaijan
Rúmenía
Írland
Króatía
Tyrkland
Svo kemst annað hvort Georgía eða Litháen og ég ætla að giska á að það verði Litháen sem komist áfram.

• Skrifa athugasemd... (0)

Ég tel að eftirtalin lög komist áfram í kvöld:

Moldavía
Slóvakía
Serbía
Belgía
Albanía
Grikkland
Rússland
Bosnía & Herzegóvína
Malta
Ísland

Áfram Ísland

• Skrifa athugasemd... (2)

Jæja, nú styttist í Eurovision. Fyrra undanúrslitakvöldið fer fram 25. maí næstkomandi. Hér ætla ég að renna yfir þau lög sem keppa þar.

Moldavía
Eurovision keppnin byrjar með krafti í ár. Það er alltaf skemmtilegra þegar keppnin byrjar með smá fjöri heldur en þegar hún byrjar á leiðinlegri ballöðu. Það er hljómsveitin Sunstroke Project og söngkonan Olia Tira sem flytja lagið Run Away. Þetta ásamt Rúmeníu verður örugglega stærsti klúbb-hittarinn í Evrópu í ár og er í raun alveg allt í lagi lag. Ef eitthvað eitt lag er að taka atkvæðin frá Íslandi þá er það þetta þar sem það er að keppa svona ca. á sama markaði en er bara miklu betra lag heldur en það Íslenska. Fer pottþétt áfram.

Rússland
Er þetta djók eða er þeim fúlasta alvara? Eftir að hafa lesið mig smá til þá skilst mér að þetta sé djók atriði en ég er ansi hræddur um að ansi margir fari á mis við djókinn og þá verður þetta meira hlægilegt heldur en fyndið. Reyndar er kaflinn “What are you doing man? I’m looking at her photos” alveg sprenghlægilegur sama hvernig á hann er litið. Rússar hafa aldrei klikkað á því að komast upp úr forkeppninni enda alltaf getað treyst á diggan stuðning frá gömlu Sovíetríkjunum. Það er spurning hvort að hann dugi nú þegar lagið er svona vont. Ég set þetta svona á grensuna á því að komast upp, það fer að verulegu leiti eftir því hvernig djókurinn kemst til skila.

Eistland
Eistland fær verðlaun fyrir skrýtnasta lagið í ár, ótrúlega spes lag og ótrúlega spes video. Það hefði væntanlega verið betra fyrir þetta lag að vera svolítið aftar í röðinni til að fólk mundi eftir því en annars er ómögulegt að segja til um það hvaða áhrif það hefur í ár þar sem nú má byrja að kjósa um leið og fyrsta lag hefst. Það fer væntanlega svolítið eftir performansinum hvort þeir komist áfram eða ekki en ég mundi segja það væru meiri líkur en minni að þetta fari áfram, aðallega vegna þess að það sker sig töluvert úr.

Slóvakía
Slóvakar hafa tóku í fyrsta sinn þátt í fyrra og komust ekki áfram enda ekki með neitt sérstakt lag. Í ár koma þeir með miklu betra lag, þjóðlaga skotið popp sem þeir syngja á eigin tungu. Þetta lag hefur unnið töluvert á hjá mér og ég mundi segja að þeir væru alveg pottþétt á leið í aðalkeppnina í ár og gætu vel endað í topp 10 þar.

Finnland
Finnar hverfa 30 ár aftur í tímann og senda nú lag í þjóðlagastíl sem er mjög sambærilegt og þeir voru að senda ár eftir ár með döprum árangri á milli 1970 og 1980. Tvær ljóshærðar skvísur sem ganga undir nafninu Kuunkuiskaajat syngja lagið Työlki Ellää (hver segir svo að það sé flókið að bera fram Eyjafjallajökull), önnur þeirra spilar á harmonikku en báðar syngja. Það er alltaf erfitt að segja til um hverngi svona þjóðlög ganga upp þá get ég engan veginn spáð þessu lagi góðu gengi og þó það sé í lakari riðlinum þá held ég að það muni sitja eftir.

Lettland
Ung, ljóshærð og hugguleg stúlka syngur dramatíska ballöðu og spyr stórra spurninga. Kunnuglegt þema? Í fyrra spurði Jóhanna Guðrún “Is it true?”, nú spyr Aisha “What for?”. Lettar ætla sem sagt að reyna íslensku leiðina í ár. Munurinn er bara sá að í lettnesku forkeppninni söng hún alveg hrikalega falskt og gleymdi meira að segja textanum. Lagið er alveg allt í lagi þó það sér svo sem ekki það eftirminnilegasta og ætti alveg að geta farið áfram upp úr forkeppninni en það kemur 100% til með að velta á framistöðu hennar Aishu.

Serbía
Serbar náðu í sitt frægasta tónskáld, Goran Bregovic og fengu hann til að semja þrjú lög. Svo voru fengnir þrír ungir söngvarar til að flytja þau og úr því kom að Milan Stankovic var valinn til að flytja lagið Ovo Je Balkan. Lagið ber alveg merki Bregovic þó að hann hafi nú samið töluvert betri lög. Þetta er þó alveg ágætt og að mínu mati með betri lögum í keppninni í ár. Þetta er þó klárlega ekki allra og ég tel sigurmöguleikana litla en þetta fer 100% áfram úr þessari forkeppni.

Bosnía & Herzegovína
Bosníumenn hafa alltaf komist upp úr forkeppninni enda oftast verið með fín lög undanfarin ár. Nú klikka þeir hins vegar alveg því eins og Balkanballöður geta verið flottar þá finnst mér svona Balkanrokk vera alveg hundleiðinlegt. Það getur hins vegar vel verið að þetta fari áfram enda er þetta kannski skásta rokklagið í þessari forkeppni auk þess sem Balkanþjóðirnar eiga nokkra fulltrúa í þessari forkeppni því þar keppa auk Bosníumanna, Serbar, Makedóníumenn, Albanar og Grikkir sem stundum hafa kastað 12 stigunum sínum á nágrannana í norðri þegar Kýpverjar hafa verið fjarri góðu gamni. Ég mundi því gefa þessu lagi meira en helmingslíkur á að komast áfram.

Pólland
Pissupása. Pólverjar senda einhvern skrýtinn þjóðlaga-rokk-vals. Bara leiðinlegt og ég tel litlar sem engar líkur á að þetta fari áfram. Það verður samt fróðlegt að sjá hversu mörg stig þetta fær frá Íslandi.

Belgía
Belgum hefur gengið illa í þessari keppni, aldrei komist upp úr forkeppninni eftir að byrjað var með hana og aðeins einu sinni lent í topp 10. Nú tel ég þó að þessum álögum loki og held að Tom Dice fá alveg örugglega öll krúttatkvæðin fyrir Damien Rice-ballöðuna sína, Me And My Guitar. Þetta lag á eftir að fá sömu atkvæði og Lettar fengu árið 2005 með ballöðunni, The War Is Not Over og Írar fengu 2006 með lagið Every Song Is A Cry For Love. Þetta lag fer 100% áfram og gæti vel endað í topp 10.

Malta
Malta sendir rosalega hefðbundna Disney ballöðu sem þeir kjósa að kalla enn þá hefðbundnara nafni, My Dream. Þetta lag er ekki að gera neitt fyrir mig en gæti samt alveg farið áfram. Ég gef þessu lagi svona 50/50 séns.

Albanía
Albönum hefur gengið ágætlega að komast upp úr forkeppninni undanfarin ár en svo hefur þeim ekki gengið neitt sérstaklega í aðalkeppninni. Ég hugsa að þetta eigi eftir að falla í sama mót og komast nokkuð örugglega upp úr forkeppninni en svo á það eftir að gleymast í aðalkeppninni enda ekkert við þetta lag sem lætur mann muna eftir því. Juliana Pasha sem syngur lagið tók einn Friðrik Ómar á þetta í ár. Hún var búin að reyna þrisvar að komast áfram, 2008 lenti hún í þriðja sæti í albönsku forkeppninni, 2009 lenti hún í öðru sæti og nú komst hún áfram. Þetta fer mjög líklega áfram.

Grikkland
Grikkland hefur verið sú þjóð sem hefur gengið einna best undanfarin ár. Eftir að forkeppnin var tekin upp hafa þeir alltaf komist áfram og alltaf endað í topp 10, og einu sinni unnið. Lagið þeirra í ár er þó eitt leiðinlegasta lagið sem þeir hafa sent og söngvarinn er algerlega laus við allan sviðssjarma og getur ekkert hreyft sig. Lagið endurtekur sig aftur og aftur og er nánast alveg eins í 3 mínútur sem virðast fyrir vikið eins og 10. Þetta á nú samt alveg örugglega eftir að fljúga í gegnum forkeppnina en mig grunnar að þetta eigi ekki eftir að ná í topp 10 í aðalkeppninni.

Portúgal
Portúgal hefur verið ein ömurlegasta þjóðin í Eurovision frá upphafi þangað til eitthvað small hjá þeim 2008. Þá komu þeir með frábært lag, Senhora do Mar og svo komu þeir aftur með ljómandi fínt lag í fyrra. ÉG vonaðist því til þess að það kæmi önnur perla frá þeim í ár. Það olli mér því smá vonbrigðum þegar kom bara svona lala ballaða frá þeim í ár. Portúgalir eiga ekki margar vinaþjóðir en mega þó reikna með atkvæðum frá Spáni og hugsanlega Frakklandi en mér þykir heldur ólíklegt að það dugi til þess að komast áfram.

Makedónía
Makedónar eru sennilega með versta lagið í keppninni ár, annað Balkanrokk lag sem er enn þá verra en það bosníska, sungið á makedónsku og bíður upp á rappkafla og gítarsóló, hvað getur klikka? Ehmmmmmmmm… allt!!! Ég ætla rétt að vona að þetta lag komist ekki áfram. Það gæti þó gerst en ég hugsa samt ekki.

Hvíta-Rússland
Hvítrússneska ríkissjónvarpið valdi hljómsveitina 3+2 í innanbúðarkosningu og í upphafi ætluðu þeir að syngja annað lag en skiptu svo á síðustu stundu yfir í lagið Butterflies. Þetta er ekkert alslæmt lag en guð minn góður hvað það er EKKERT að gerast í þessu lagi. Ef það verða ekki allir sofnaðir eftir þetta lag þá er þetta nú alveg fullkomna lagið til að hafa fyrir framan okkur Íslendinga. Ég tel afskaplega litlar líkur á því að þetta lag fari áfram.

Ísland
Ég hef nú áður tjáð mig um íslenska framlagið í ár og verð að játa að ég er ekki mesti aðdáandi þeirrar lagasmíðar, svo ég kveði ekki sterkar að orði. Fyrirfram var ég eiginlega alveg viss um að við færum ekki áfram úr forkeppninni, lagið er ófrumlegt og við eigum engar vinaþjóðir í þessu undanúrslitakvöldi. En svo fáum við þennan líka fína dráttinn, þ.e. syngjum síðastir og beint á eftir döll leiðinlegri ballöðu svo það gæti hjálpað. SVo eru nú fleiri vond lög í þessu undanúrslitakvöldi heldur en á því seinna. Þannig að eftir á að hyggja eigum við alveg möguleika en ég mundi ekki veðja stórum fjárhæðum á það og það kæmi mér alls ekkert á óvart þó að við sætum eftir.

Þannig að svona líta grúppurnar út hjá mér:

Pottþétt áfram:
Moldavía
Slóvakía
Serbía
Belgía
Albanía
Grikkland

Kannski áfram:
Rússland
Eistland
Lettland
Bosnía & Herzegóvína
Malta
Ísland

Ekki áfram:
Finnland
Pólland
Portúgal
Makedónía
Hvíta-Rússland

Niðurstaðan er sem sagt sú að Ísland er eitt af sex lögum sem berjast um fjögur laus sæti.

• Skrifa athugasemd... (1)