Þröllinn bloggar

Síðasta æfingin fyrir lokakvöldið er í gangi núna og þetta segir Andrew (einn af írsku bloggurunum þremur sem ég fylgist með):

Iceland and Yohanna up next. This is a typical Eurovision style ballad lovely
girl singing in English with a lovely build to the song. Very blue/white setting.
Yohanna wears lighter blue and her vocals are faultless. I absolutely adore
this song and have gotten to know many of the Icelandic delegation in the hotel.
But i am not biased toward it as it merits a high place. I predict 5-10th.
Huge reaction in the hall.

Þetta verður spennandi!!!!!!!!!!!!!

• Skrifa athugasemd... (1)

Í dag eru búnar tvær æfingar fyrir lokakvöldið á morgun. Seinni æfingin var sérstaklega mikilvæg þar sem þetta er sú æfing sem dómnefndirnar horfa á og gefa sín stig út frá. Jóhanna Guðrún stóð sig víst alveg frábærlega eins og alltaf og skilaði sínu frábærlega. Óskar Páll, höfundur lagsins, heldur því fram að við séum í raun að njóta góðs af því hversu einfalt atriðið okkar sé því að það eru engin vandræði með myndvinnslu eða kameruskot en önnur stærri og flóknari atriði hafa ekki gengið alveg eins vel. Þar að auki hafa verið mikið af töfum þar sem er verið að reyna að koma öllum sviðsmyndunum fyrir á þessu stutta tíma á milli atriða, þar fara Bretar, Armenar og Úkraínumenn fremstir.

Þjóðverjar ollu miklu uppnámi þegar bandaríska strippmódelið, Dita Von Teese sem leikur Miss Kiss í laginu Miss Kiss Kiss Bang Bang fækkaði fötum meira en góðu hófu gegnir þannig að hún endaði með brjóstin ber nema með einhverjar límmiðastjörnur sem huldu geirvörturnar. Hún gekk nú ekki svo langt á æfingunni í kvöld enda held ég að hún geri sér grein fyrir því að það mundi ekki gefa mörg stig frá dómnefndunum. Spennandi verður að sjá hversu langt hún gengur á laugardaginn og spurning hvort að þeir sem senda út keppnina þurfi að klippa á beinu útsendinguna og sýna frá æfingunni í kvöld í staðinn.

Það hefur einnig mikið verið skrafað og rætt um Spánverja sem gáfu keppninni eitt stórt fokk jú í gær. Upphaflega áttu Spánverjar að kjósa í fyrri undankeppninni og þurftu því að sýna hana beint. Það gekk ekki þar sem það er bundið í lög að sýna skuli frá störfum þingsins á þessum degi. Spánverjar fengu því undanþágu og fengu leyfi til að sýna og kjósa í seinni forkeppninni. Þegar keppnin í gær átti að hefjast var hins vegar útsending frá tennisleik og því var eurovision forkeppnin sýnd með klukkutíma seinkun og því var ekki hægt að hafa neina símakosningu og því giltu atkvæði dómnefndarinnar sem stigagjöf fyrir Spán. Nú hefur EBU (samtök evrópskra sjónvarpsstöðva) gefið það út að gripið verði til einhverra refsiaðgerða gagnvart spænska ríkissjónvarpsstöðvarinnar en það muni þó ekki hafa nein áhrif á þátttöku spánverja í ár.

Ég ætla að skella smá spá fram fyrir kvöldið og ég vil endilega fá smá spá frá þeim sem lesa hérna í athugasemdirnar.

1. Noregur
2. Bosnía & Herzegóvína
3. Grikkland
4. Tyrkland
5. Azerbaijan
6. Úkraína
7. Armenía
8. Eistland
9. Ísland
10. Svíþjóð
11. Króatía
12. Portúgal
13. Bretland
14. Frakkland
15. Albanía
16. Moldavía
17. Spánn
18. Danmörk
19. Malta
20. Ísrael
21. Litháen
22. Rússland
23. Rúmenía
24. Þýskaland
25. Finnland

• Skrifa athugasemd... (1)

Peter, einn af írsku bloggurunum sem ég les alltaf segir þetta um íslenska lagið:

I loved Iceland. It has one of the best backdrops in the contest ( now that Swizerland has not made the final), vocals sounded great in the arena and it got a great reaction. Singing 7th is not the best draw in thefinal, especially after so many ballads but this is still a possible winner for me.

Áhugavert!!! En ég ætla nú að rétt að vona að við séum ekki að fara að vinna keppnina, það er nú það síðasta sem við þurfum á að halda í kreppunni

• Skrifa athugasemd... (1)

• Ég stend við spána sem ég gerði á mánudaginn en hún var svona:
  1. Noregur
  2. Grikkland
  3. Azerbaijan
  4. Úkraína
  5. Serbía
  6. Albanía
  7. Eistland
  8. Moldavía
  9. Króatía
  10. Litháen
  11. Danmörk
  12. Slóvenía
  13. Ungverjaland
  14. Írland
  15. Holland
  16. Pólland
  17. Slóvakía
  18. Lettland
  19. Kýpur
• Ég held að aðalbaráttan um tvö síðustu lausu sætin muni standa á milli Króatíu, Danmerkur og Litháen. Ég held að Danir eigi ekki mikinn séns á dómnefndasætinu þannig að þeir verða að ná inn á topp 9 og því miður frænda okkar vegna held ég að það takist ekki hjá þeim.
• Annar kandídat á dómnefndasætinu er Pólland en þá verður Lidia að synga töluvert betur en hún hefur verið alveg skelfileg á æfingunum
• Hollendingar gætu grætt á að vera síðastir á sviðið og þeir eru vissulega með eftirminnilegt atriði en miðað við fyrra undanúrslitakvöldið þá duttu öll kjánalegu atriðin út og ég er hræddur um að Hollendingar geri það líka.
• Við megum búast við alla veganna nokkrum vandræðalegum samtölum á milli kynnana eða leiðinlegra innlita inn í græna herbergið þar sem nokkur atriðin, einkum Úkraína, Grikkland og Slóvenía eru með mikið af aukahlutum inni á sviðinu og sviðsmennirnir hafa ekki alltaf náð að koma sviðsmyndinni fyrir í tíma.
• Norsarinn, Alexander Rybak, fann sig víst ekki alveg á æfingum í gær en mér skilst að hann hafi verið miklu betri í dag. Hann er líka á fáránlega góðum stað í röðinni, beint á eftir Póllandi og á undan Kýpur. Ég á því fastlega von á að hann verði efstur í kvöld.
• Tvö lög í kvöld byggja mikið upp á strengjahljómsveitum í kvöld, Eistar og Slóvenar. Af þeim þykir eistneska lagið töluvert betra og gerir það sennilega möguleik Slóvena á að komast áfram ansi litla.
• Úkraínumenn eru gjörsamlega óver ðe topp í fylgihlutum og búningum og performansi en eiga eftir að fljúga áfram.
• Einhverjir eru að spá Lettum áfram en ég sé það ekki. Mér finnst lagið bara of vont en það kemur þeim þó til góða að þeir eiga mikið af nágrannaatkvæðum í kvöld en ég trúi ekki öðru en að þau fari frekar á Eista, Litháena og Úkraínu.
• Samkvæmt Big Poll 2009 á ESCToday munu eftirfarandi lög fara áfram:
  1. Noregur
  2. Grikkland
  3. Azerbaijan
  4. Eistland
  5. Úkraína
  6. Danmörk
  7. Albanía
  8. Litháen
  9. Pólland
  10. Modavía / Kýpur

  Samkvæmt þessari spá mun Moldavía vera 10. landið í símakosningum en Kýpur mun fara áfram sem dómnefndarlag. Big Poll spáði öllum lögunum rétt áfram í fyrri undankeppninni en ég hef ekki trú á því að þeir verði með öll rétt í kvöld.

• Skrifa athugasemd... (0)

Eftirtalin 10 lög fóru áfram í kvöld:

• Tyrkland
• Svíþjóð
• Ísrael
• Portúgal
• Malta
• Finnland
• Bosnía & Herzegóvína
• Rúmenía
• Armenía
• Ísland

Maður verður nú að viðurkenna að maður var orðinn andsk… stressaður þarna í lokin en eftir að niðurstöðurnar höfðu verið tilkynntar þá verður nú að viðurkennast að það var ekkert sem kom stórkostlega á óvart. Eftir að hafa séð performansinn í kvöld spáði ég reyndar að Hvíta Rússland og Makedóía færi áfram frekar en Malta og Ísrael en ég get ekki sagt að nein þjóð hafi komið mér neitt stórkostlega á óvart. Það sem kom helst á óvart var að það fóru 5 ballöður áfram (Ísrael, Portúgal, Malta, Bosnía og Ísland) en ekkert rokklag (Hvíta Rússland, Sviss eða Makedónía) en það er svona mænor surpræs og ég á ekki eftir að sakna neins þessara laga í úrslitunum.

Mér þykir nokkuð athyglisvert að öll lögin sem komust áfram núna fóru líka áfram í fyrra og öll lögin sem sátu eftir í kvöld sátu eftir í fyrra.

Búlgaría var sennilegra versta atriði sem nokkurn tímann hefur verið sýnt í eurovision og þar er af nógu að taka. Það verður nú að teljast Íslandi mjög til happs að hafa fengið að keppa á eftir þessu skelfilega lagi.

Maltneska lagið þykir mér afskaplega þunnt og þó að söngkonan sé vissulega frábær þá er þetta söngvakeppni, ekki söngkeppni og því hefði ég ekki séð mikið eftir því að það lag sæti eftir. Það kæmi mér ekki á óvart að annaðhvort Malta eða Ísrael hafi verið lagið sem dómnefndirnar kusu áfram.

Ísland mun stíga á svið sem sjöunda þjóð á laugardagskvöldið, beint á eftir Portúgal. Það verður að teljast frekar óheppilegur dráttur; bæði að vera svona framarlega og beint á eftir ballöðu. Þar að auki eru Ísrael og Frakkar með ballöður númer tvö og þrjú í röðinni þannig að keppnin á eftir að fara rólega af stað á laugardagskvöldið.

Finnar fengu góðan drátt og verða 24. eða næst síðastir á svið, beint á eftir Bretum. Jafnvel má telja að Bretar hafi verið enn þá heppnari með dráttinn, þar sem þeri fengu Rúmena á undan sér og Finna á eftir sér. Þeir eru því seint í röðinni með tvö “slök” hröð lög á undan og eftir sér, ekki ósvipaður dráttur og Jóhanna var með í kvöld. En ég hef samt ekki nokkra trú á því að bretarnir verði í toppbaráttu í ár. Sennilega verða þeir um miðja keppni sem verður að teljast góður árangur þar á bæ miðað við hvað þeim hefur gengið illa undanfarin ár.

Bosníumenn verða 12. og Tyrkir 18. á svið. Ef Norðmenn fá drátt einhvers staðar á eftir 12 eða númer 8 (beint á eftir ballöðuromsunni í upphafi keppninnar) er ég nokkuð viss um að þeir muni vinna keppnina. Annars verður maður að sjá til hvaða lög umkringja það.

• Skrifa athugasemd... (5)

Samkvæmt Big Poll 2009 á ESC Today þá verða eftirtaldar þjóðir efst í kosningunni í kvöld:

1. Tyrkland
2. Bosnía & Herzegóvína
3. Svíþjóð
4. Ísland
5. Malta
6. Finnland
7. Rúmenía
8. Armenía
9. Portúgal
10. Sviss

En samkvæmt þessari spá mun Sviss ekki komast áfram þar sem 10. lagið verður Ísrael sem dómnefndirnar munu bjarga því.

Þetta lofar vissulega góðu fyrir okkur en er nú samt bara svona vísbending. Sjálfur er ég handviss um að Bosnía verður efst í kvöld og Armenía á eftir að lenda ofar en 8. sæti og Svíþjóð og Finnar eiga eftir að lenda neðar.

• Skrifa athugasemd... (0)

• Íslendingar virðast ætla að bregðast við gagnrýni minni um að kjóllinn falli of mikið inn í bakgrunninn með því að bæta þurrís á sviðið. Þetta virðist vera ákveðið trend í ár og eru fleiri þjóðir sem nota þetta, m.a. rokkararnir frá Sviss. Ég er ekki frá því að þetta hjálpi en ég er samt á því að hún hefði frekar átt að vera í hvítum kjól.
• Æfingar hjá Finnum hafa gengi frekar illa og söngkonan er frekar fölsk. Ég gæti því þurft að droppa Finnum niður um klassa niður í ágætismöguleika klassann.
• Belgíski Elvisinn og hin belgíska Hadise sem keppir fyrir Tyrkland hafa verið að glíma við veikindi og hafa ekki sungið eins vel og þau geta. Það hefur þó engin áhrif á Tyrkland sem eru pottþéttir áfram en Belginn þarf á öllu sínu að halda ef hann ætlar að komast áfram. Við vonum því að hann skríði saman fyrir kvöldið.
• Ég er hrikalega hræddur um að ég hafi vanmeti Makedóníu sem eru með skelfilegt lag en þeir eiga eftir að fá fullt af stigum frá Bosníu & Herzegóvínu, Svartfjallalandi og Tyrklandi og það er spurning hvort þau stig fari ekki langleiðina með að senda þá áfram. Ég vona svo sannarlega að það gerist ekki en það gæti gerst.
• Kynnar kvöldsins eru víst algerlega óhæfir. Það virtist skipta Rússana meira máli að finna eitthvað fallegt fólk sem talar ensku frekar en að það hefði einhverja reynslu eða hæfileika til að hósta svona kvöld. Natalia Vodianova er víst eitthvað módel sem hefur búið í Bretlandi í einhver ár en hefur aldrei verið svona kynnir og er víst frekar klaufaleg. Þar að auki á hún í miklu basli með frönskuna sem hún hefur væntanlega þurft að læra eins og páfagaukur, eða eins og Víðir bróðir fyrir franska pönnukökuprófið sitt. Eini munurinn er bara að Víðir fékk víst 8,5 en miðað við æfingarnar á Natalia eftir að kolfalla.

• Skrifa athugasemd... (0)

Þó maður sé nú öllu spenntari fyrir fyrra undanúrslitakvöldinu núna ætla ég að skella í smá færslu varðandi seinna kvöldið sem verður á fimmtudaginn og gera þetta svipað og síðustu færslu.

Alveg örugg áfram

Noregur

æfing 1 - æfing 2

Þetta lag er alveg 100% pottþétt að fara upp úr undankeppninni og ef þeir verða ekki mjög óheppnir með drátt á lokakvöldinu á þetta lag eftir að vinna þessa keppni og líklega með nokkrum yfirburðum. Veðbankarnir eru líka búnir að vera með þetta langefst á sínum listum frá því að þeir opnuðu.

Grikkland

æfing 1 - æfing 2

Þó ég sjái ekki önnur lög en Noreg eða Bosníu vinna keppnina í ár þá eru Grikkir ásamt Tyrkjum væntanlega þær þjóðir sem eiga besta sénsinn á að blanda sér í baráttuna um sigur. Sakis Rouvas er náttúrulega hörkuperformer þó hann sé “kannski” ekki besti söngvari í heimi þá er það náttúrulega algert aukaatriði. Grikkirnir kunna líka að setja á svið hörku sjóv og eru með alls konar gimmikk á sviðinu sem gera lagið eftirminnilegt.

Azerbaijan

æfing 1 - æfing 2

Ég er hræddur um að Azerbaijan eigi eftir að bætast í hóp þjóða eins og Tyrkja sem komast alltaf áfram sama hversu vont lag þeir eru með, alla veganna miðað við árangurinn þeirra í fyrra. En í ár eru þeir alveg með ágætislag og eiga pottþétt eftir að fljúga upp úr forkeppninni og örugglega lenda ofarlega í aðalkeppninni. Á lokakvöldinu stela þeir svo örugglega stigum frá Skandinavíumafíunni því karlsöngvarinn er sænsk/íranskur.

Úkraína

æfing 1 - æfing 2

Úkraína hefur verið einna allra skemmtilegasta þjóðinn í keppninni undanfarin ár og aðeins einu sinni lent neðar en 7. sæti síðan þeir unnu keppnina á sínu 2. ári 2004. Nú tefla þeir fram nokkuð solid lagi með brjáluðu performansi þó þeir skjóti kannski svolítið yfir markið á köflum. Það hefur verið svolítið vesen á þeim á æfingunum því það fylgir þeim svo mikið af aukahlutum þannig að það hefur tekið mikinn tíma að koma því öllu fyrir á sviðinu. Það er því nokkuð magnað að þeir ætli að koma þessu öllu á sviðið á þessari mínútu sem þeir hafa á milli laga í keppninni sjálfri. Þar að auki er Svetlana Loboda ekki alveg að ráða við lagið og þá grípa þeir til þess að láta bakraddarsöngkonuna syngja yfir hana. Allt mjög elegant og flott og flýgur því áfram úr forkeppninni.

Nokkuð örugg áfram

Serbía

æfing 1 - æfing 2

Serbar (og þar áður Serbar og Svartfellingar) hafa á undaförnum árum sent frábærar balkanballöður en í fyrra dugði það ekki nema í 6. sætið eftir að hafa unnið árið áður. Þeir tefla því á ný mið núna og fara í flippið og syngja um skó. Ekki er þetta besta lag í heimi og flutningurinn ekki til að bæta það en það er eitthvað við þetta atriði og þennan performans sem mér finnst alveg þrælskemmtilegt og þeir eru svo hressir og kátir á sviðinu. Svo geta Serbar treyst á stig frá Króatíu, Slóveníu og Albaníu þannig að ég er nokkuð viss um að þetta eigi eftir að komast áfram.

Albanía

æfing 1 - æfing 2

Albanía er að mínu mati með mjög flott núna og hún 16 ára gamla Kejsi Tola syngur það alveg þrælvel. Þeir eru með nokkuð sérstakt atriði, Kejsi er þarna í mjög stuttum kjól og í kringum hana skoppa þrír dansarar, tvíburar sem eru ca. 120 cm á hæð og gætu vel leikið hobbita í Hringadrottinsögu og svo er einhver grímuklæddur gaur í furðulegum grænum búning. En lagið er bara fínt og ég hef ekki nokkra trú á öðru en að þetta eigi eftir að fljúga áfram.

Ágætis möguleiki

Eistland

æfing 1 - æfing 2

Eistar senda mjög flott og syngja á sínu tungumáli. Það er strengjasveitin Urban Symphony sem flytur þeirra lag, fyrst fannst mér það ekkert sérstakt en eftir því sem ég hlusta oftar á það finnst mér það alltaf flottara þannig að það er spurning hvort að það grípi evrópska áhorfendur svona í fyrstu hlustun. Annað sem gæti unnið gegn því er að Slóvenía er með mjög sambærilegt lag en mér finnst eistneska lagið bara miklu betra þannig að ég geri frekar ráð fyrir að eistar fari áfram en Slóvenar sitji eftir.

Moldavía

æfing 1 - æfing 2

Moldóvar fara í þjóðlega pakkann og tefla fram lagi sem gæti verið klippt út úr bíómyndinni um Borat. Reyndar finnst mér afskaplega kjánalegt að hún skuli reyna að syngja að hluta til á ensku því eins og hún gerir í videóinu en sem betur fer virðist hún ekki ætla að gera það í keppninni sjálfri. Lagið finnst mér ágætt og svona þjóðlagapopp með flottu þjóðlegu dansatriði á alltaf einhverja fylgismenn og á þar af leiðandi ágætis séns á að komast áfram. Þar að auki eru búningarnir alveg svakalega flottir, ég mæli með að þið kíkið á þá á æfingu 2.

Barátta um síðustu tvö sætin

Króatía

æfing 1 - æfing 2

Króatar tefla fram tregafyllstu balkanballöðunni í ár. Veðbankarnir telja að þetta lag verði meðal þeirra neðstu og flestar spár spekúlanta og bloggara gera ráð fyrir að þeir komist ekki áfram. Ég ætla samt að spá að þeir komist áfram þar sem svona tregafullar balkanballöður virðast hreinlega alltaf komst áfram. Auk þess hefur Króatía alltaf komist upp úr forkeppninni ef frá er talið árið 2007 þegar þeir voru með glatað lag.

Litháen

æfing 1 - æfing 2

Litháenar tefla fram einhvers konar R&B ballöðu og er hún vel flutt af Sasha Son en lagið þykir mér ekkert sérstakt, það á þó örugglega einhverja fylgismenn og það er Litháum líka til happs að bæði Lettar og Eistar eru með þeim í seinni undankeppninni og því geta þeir treyst á þó nokkur stig þaðan. Þar að auki gætu Litháar fengið ágætisskor frá dómnefndunum. Litháar eru samt í einhverri brjálaðri fýlu núna af því að þeir eru afskaplega óánægðir með lýsinguna og finnst hún leiðinleg. Þar að auki vilja þeir fá eitthvað videó í bakgrunninn sambærilegt við það sem Rússar eru að nota en einhverra hluta vegna var ekki hægt að gera það.

Danmörk

æfing 1 - æfing 2

Ef Danir hefðu sent Heru Björk hefði ég sagt að þeir væru pottþéttir áfram en þetta lag finnst mér ekki nærri því eins sterkt þannig að það mun væntanlega standa mjög tæpt hvort þeir komist áfram og einhvern veginn finnst mér ólíklegt að þeir komi til með að fá dómnefndaratkvæðin þannig að þeir þurfa að ná einu af 9 efstu sætunum og það verður fróðlegt að sjá hvort það takist, ég mundi alla veganna ekki þora að veðja mjög háum fjárhæðum á það.

Slóvenía

æfing 1 - æfing 2

Að mínu mati voru Slóvenar nokkuð öruggir áfram þar til það kom í ljós að þeir lenda í sama riðli og Eistar. Þessi lög eru mjög keimleik en að mínu mati er eistneska lagið miklu betra og veldur því að Slóvenar eiga örugglega ekki eftir að fá eins mörg stig og þeir hefðu fengið ef þeir kepptu í fyrri riðlinum.

Ungverjaland

æfing 1 - æfing 2

Bloggararnir sem ég les hvað mest spurðu sig að því hvort það væri hægt að vera of gay fyrir eurovision og í tilfelli Ungverja í ár væri það sennilega hægt. Þetta lag á nú samt alveg smáséns á að komast áfram en ég er svolítið hræddur um að það eigi eftir að týnast í fjöldanum enda er lagið sjálft frekar auðgleymanlegt.

Smá séns en ólíklegt

Írland

æfing 1 - æfing 2

Írar senda stelpnarokksveit sem minnir ískyggilega mikið á hljómsveitina sem Harasystur frontuðu í forkeppninni hérna heima. Írar binda miklar vonir við þetta lag en ég er ansi hræddur um að lagið sé ekki nógu sterkt. Ekki hjálpar til að Írarnir voru afskaplega óánægðir með bakgrunninn á sviðinu sem þeir fengu en voru bara of seinir til að mótmæla því og því sitja þeir uppi með þennan bakgrunn.

Holland

æfing 1 - æfing 2

Hollendingar tefla fram old boys bandinu De Toppers. Þetta eru svona krúttlegir, sköllóttir og þybbnir kallar á fimmtugsaldri sem hefur lengi dreymt um það lengi að taka þátt í eurovision. Þeir eru víst nokkuð vinsælir í Hollandi og hafa gert nokkuð að því að syngja ABBA ábreiður. Þeir vekja ávalt mikla athygli fyrir klæðaburðinn og á sviðinu munu þeir vera í teinóttum jakkafötum þar sem hvítu rendurnar eru einkar athyglisverðar, svo ekki sé meira sagt. Þetta er sennilega eitthvað hallærislegasta atriði sem hefur verið sent í eurovision lengi en lagið hefur samt alveg ágætan krók, einnig hjálpar það þeim að vera síðastir á svið. Lagið versnaði þó til muna þegar þeir ákváðu að syngja einhverja remix útgáfu af laginu.

Pólland

æfing 1 - æfing 2

Pólverjar senda 30 stúlku að nafni Lidia Kopania. Rússarnir hafa átt afskaplega erfitt með að rita nafnið hennar rétt og hafa kallað hana Lidia Koponia og Lidia Kopanova en þeir virðast vera komnir með þetta á hreint núna. Lidia syngur ágætis ballöðu en það verður að segjast að æfingarnar hafa gengið alveg skelfilega hjá henni og hún hefur verið alveg rammfölsk. Það er óhætt að segja að ef hún bætir sig ekki mjög mikið á hún ekki séns á að komast áfram en ef hún syngur vel gæti hún nælt sér í dómnefndasætið.

Ekki séns á að komast áfram

Slóvakía

æfing 1 - æfing 2

Slóvakía teflir fram rosa drama-ástar-ballöðu. Þetta er mjög vel flutt og æfingar hjá þeim hafa gengið vel en sennilega á þetta nú ekki nokkurn möguleika á að komast áfram.

Lettland

æfing 1 - æfing 2

Lettland sendir skelfilegt lag um umferðaröngþveiti. Fær væntanlega einhver stig frá nágrönnum sínum í Litháen og Eistlandi en örugglega ekki mikið meira og ég get ómögulega séð að þetta lag komist áfram.

Kýpur

æfing 1 - æfing 2

Kýpur sendir hundleiðinlega ballöðu og í forkeppninni í Kýpur var hún alveg rammfölsk. Æfingarnar í Moskvu hafa þó gengið ágætlega hjá þeim og sviðsmyndin er mjög flott en ég hef ekki trú á að þetta lag eigi eftir að fá mikið fleiri stig en stigin 12 sem þeir fá væntanlega frá Grikkjum.

Ég spái því að röðin verði eftirfarandi:
1. Noregur
2. Grikkland
3. Azerbaijan
4. Úkarína
5. Serbía
6. Albanía
7. Eistland
8. Moldavía
9. Króatía
10. Litháen
11. Danmörk
12. Slóvenía
13. Ungverjaland
14. Írland
15. Holland
16. Pólland
17. Slóvakía
18. Lettland
19. Kýpur

Að auki ætla ég að spá að símaatkvæðin og dómnefndirnar eigi eftir að skila sömu lögunum í 10 efstu sætin og því eigi þessi 10 efstu eftir að fara áfram í aðalkeppnina. Danmörk yrði í raun óvæntasta snöbbið og Króatía er þá óvæntasta lagið sem kemst áfram.

• Skrifa athugasemd... (0)

Eins og einhverjir hafa tekið eftir þá er ég nánast alveg hættur að blogga. En ég verð að viðurkenna það að mér líður hálf kjánalega að skella ekki alla veganna í eina analyzeringar- og spámannsfærslu. Þessi færsla mun fjalla um fyrri undankeppnina þar sem við Jóhanna Guðrún eða Yohanna tekur þátt fyrir hönd okkar Íslendinga. Ég hef ekkert unnið í því að bjóða lögin til niðurhals í þetta skiptið en fyrir ykkur sem viljið downloada þeim þá bendi ég á þessa síðu: www.allkindsofeverything.ie. Ef þið skrollið þar niður aðeins þá er hægt að download-a flestum lögunum og sjá link á þau á Youtube. Þeir sem halda úti þessari síðu eru líka úti í Moskvu núna og blogga þar um æfingarnar og allt sem er að gerast og mæli ég algerlega með því. Bloggið þeirra er á slóðinni akoe07.livejournal.com.

Hérna koma lögin, ég skipti þeim í nokkrar grúppur eftir því hversu góðann möguleika þau eiga á að komast upp úr undankeppninni. Ég set tvo linka með hverju lagi, einn á video af laginu og annan á æfingu á sviðinu í Moskvu.

Örugg áfram

Bosnía og Herzegóvína - æfing

Þetta lag er alveg 100% pottþétt að fara upp úr undankeppninni og er að mínu mati það lag ásamt Noregi sem á besta séns á að vinna keppnina. Þetta er flott Balkanballaða flutt af einni vinsælustu rokkhljómsveit Balkanskaga, Regina, og fær líklega 12 stig frá öllum ríkjum fyrrum Júgóslavíu.

Tyrkland - æfing

Tyrkland eru sennilega alltaf öruggir upp úr undankeppninni. Nú tefla þeir fram vinsælli söngkonu, Hadise, sem er fædd í Belgíu en af tyrknesku bergi brotin. Hún er með svona nútímalegt lag sem þó hefur nóg að svona þjóðlegum einkennum til að fúnkera í eurovision. Þetta er svona einhvers konar blanda af Beyoncé, Sertab Erener sem vann fyrir Tyrki 2003 og Elenu Paparizou sem vann fyrir Grikki 2005. Þó þetta sé ekki alveg minn tebolli þá er þetta svona klassískt eurovision danslag sem endar mjög ofarlega og er eitt af mjög fáum lögum sem ég gef pínulítinn séns á að komast upp á milli eða hugsanlega upp fyrir Bosníu og Noreg.

Armenía - æfing

Þetta er ágætis þjóðlagapopp með flottan krók og Armenar eru í sömu stöðu og Tyrkir hvað það varðar að þeir eiga gríðarlega marga innflytjendur úti um alla Evrópu og geta því treyst á ansi mörg stig frá þeim. Þetta lag á örugglega eftir að enda ofarlega en ég tel það og önnur lög sem koma hér að neðan ekki eiga neinn séns á sigri.

Mjög líkleg en ekki alveg örugg

Svíþjóð - æfing

Svíar tefla fram einni sinni eftirsóttustu óperudívu, Malenu Ernman sem verður áreiðanlega að teljast einn allra besti flytjandinn í ár ef ekki sá besti. Lagið finnst mér líka þrælflott og eiga skilið að vera í toppbaráttunni en eitthvað segir mér að svona óperupopp nái ekki til alveg nógu margra til þess að vera alveg í toppnum, einhvers staðar á bilinu 8-12 finnst mér líklegra.

Portúgal - æfing

Fyrir tveimur árum síðan var Portúgal sú þjóð sem mér fannst leiðinlegust í Eurovision, ár eftir ár gat maður treyst á glatað lag frá Portúgal. Það breyttist heldur betur í fyrra þegar þeir sendu frábært lag, Senhora do mar sem lenti í 2. sæti í undankeppninni og þó hún hafi ekki náð nema 13. sæti í úrslitum þá verður það að teljast frábær árangur miðað við það að þeir höfðu aldrei náð að komast upp úr undankeppninni og höfðu ekki endað ofar en 15. sæti frá því þeir lentu í 12. sæti 1998. Það kom mér því nokkuð á óvart þegar annað árið í röð eru þeir að senda frábært lag, þjóðlegt og sætt. Í dag finnst mér líklegt að ég eigi eftir að greiða tvö atkvæði í forkeppninni, annað fer á Svíþjóð og hitt á þetta.

Finnland - æfing

Finnland senda svona eurotrash popp/rapp og verð ég að segja það að ég er ekki að fíla þetta neitt sérstaklega en verð þó að telja mjög líklegt að svona músik eigi nógu marga fylgismenn í Evrópu til að koma því nokkuð örugglega upp úr forkeppninni.

Ágætismöguleiki á að komast upp

Hvíta-Rússland - æfing

Fyrst þegar ég heyrði þetta lag var ég alveg handviss að þetta ætti ekki séns á að komast upp en eftir að hafa séð það á sviðinu á æfingum þá finnst mér mjög líklegt að þetta eigi eftir að fá rokkatkvæðin sem Finnland fékk í fyrra og þar með eiga ágætis möguleika á að fara upp úr forkeppninni.

Ísland - æfing 1 - æfing 2

Æfingar hafa gengið vel hjá íslenksa hópnum og Jóhanna Guðrún hefur verið öryggið uppmálað. Einhverjir bloggarar hafa áhyggjur af því að þetta sé ekki nógu líflegt performance en ég veit ekki hvað á að gera meira með svona ballöðu. Ég sé alla veganna ekki að það hjálpi að hafa einhverja dansandi á stultum fyrir aftan hana :-/ Það sem ég hef aftur á móti smá áhyggjur af er kjóllinn hennar sem má sjá á æfingu tvö, hann er fölblár og bakgrunnurinn er alveg blár þannig að hún hálftýnist á sviðinu en við vonum að það hafi ekki mikil áhrif. í kosningu þar sem þeir sem eru að fylgjast með keppninni úti í Moskvu kjósa sín uppáhaldslög er Ísland í fjórða sæti og nánast allir veðbankar spá okkur áfram en ég yrði svo sem ekkert stórkostlega hissa þó við kæmumst ekki áfram. Ég held að baráttan standi einna helst á milli okkar og Möltu um ballöðu atkvæðin og ég verð að segja að þó að Chiara frá Möltu sé reynslubolti í þessu og frábær söngkona þá finnst mér Íslenska atriðið og lagið meira heillandi (og ég er alveg hlutlaus… hóst hóst). Ég spái okkur því áfram en eins og ég segi má allt eins búast við að við lendum rétt fyrir utan topp 10.

Berjast um síðustu tvö sætin

Sviss - æfing

Sviss tefla fram iðnaðarrokkhljómsveitinni Love Bugs. Þetta er svona allt í lagi lag, þeir lúkka flottir á sviði og mér finnst allt eins líklegt að þeir komist áfram.

Rúmenía - æfing

Rúmenar tefla fram hundleiðinlegu lagi sem gæti þó farið áfram. Ég set það hérna í 10. sætið en vona að það detti út þar sem að dómnefndirnar ákveði að bjarga einhverju öðru lagi eins og Ísrael eða Svartfjallalandi.

Ísrael - æfing

Ísraelar fara alveg nýja leið og ákveða að tefla fram friðarballöðu, tja eða ekki. Í fyrra helt ég að Ísraelar ættu ekki séns en þá flugu þeir áfram og enduðu í 9. sæti. Flytjandurnir Noa og Mira eru ekki eins heillandi og Boaz var í fyrra en þetta gæti þó tekið dómnefndaatkvæðin. Fyrir þá sem ekki vita þá er fyrirkomulagið í undankeppnunum það sama og í fyrra, þ.e. símakosning ákveður 9 efstu lögin en dómnefndir í löndunum ákveða 10. lagið.

Makedónía - æfing

Makedónar tefla fram Bon Jovi wannabe rokkurunum í Next Time. Undir venjulegum kringumstæðum ætti þetta glataða lag ekki möguleika á að komast áfram en Makedónar fá alltaf fullt af nágrannastigum þannig að reikna má með að þeir fái fullt af stigum frá Bosníu og Svartfjallalandi en ég vona að það dugi ekki til. Í fyrra voru þeir með glatað lag en enduðu samt í 10. sæti en þá ákváðu dómnefndirnar að Charlotte Perelli frá Svíþjóð færi frekar áfram sem 10. þjóð. Svipað gæti vel komið upp í ár en ég vona að þetta endi neðar.

Malta - æfing

Malta tefla fram reynsluboltanum Chiöru sem lenti í 3. sæti 1998 og 2. sæti 2005, í bæði skiptin með yndisleg lög í frábærum flutningi. Nú fara Maltverjar sömu leið og tefla fram ballöðu, en vandamálið er bara að lagið er ekki nándar nærri gott og hin tvö. Flestir veðbankar spá henni áfram en ég ætla að veðja á að hún verði óvæntasta snöbbið í ár og ef hún fer áfram þá finnst mér líklegt að það verði dómnefndirnar sem kjósi hana áfram.

Svartfjallaland - æfing

Tefli Maltverjar fram reynslubolta þá veit ég ekki hvað er hægt að segja um höfund lags Svartfellinga, Ralph Siegel sem er með lag í Eurovision í 19. skipti. Lagið er frekar klisjulegt eins og flest lög Ralph Siegel undanfarin árin. Menn tala um þetta sem Vrag naj vzame-lag þessa árs, þ.e. ágætislag með fínan krók en vantar einhvern sjarma til að komast áfram. Ég á satt best að segja bágt með að trúa að bæði Svartfjallaland og Makedónía eigi eftir að detta út á þessu stigi en ég læt spánna standa svona.

Ekki mikill séns á að komast áfram

Belgía - æfing

Belgar tefla fram belgískri Elvis eftirhermu með lagið Copycat sem er eins og klippt út úr “The Elvis Song Book”. Mér finnst þetta ekkert svo skelfilegt en sennilega á þetta ekki mikinn séns á að komast áfram. Varla hjálpar það að Elvisinn, Patrick Ouchène hefur verið veikur í Moskvu og misst röddina sína en við vonum að það skáni fyrir þriðjudag.

Ekki fræðilegur möguleiki á að komast áfram

Andorra - æfing

Danska söngkonan Susanne Georgi keppir fyrir Andorra en hún var víst í einhverju stelpu dúói, Me & My sem átti einn minor smell, Dup I Dub. En það er auðvelt að segja það nú að hún á ekki fræðilegan möguleika á að komast áfram, og sú litla von sem þeir áttu hvarf endanlega þegar Spánverjar fengu leyfi til að kjósa í seinni undankeppninni. Svo hjálpar ekki að bæði Frakkar og Danir kjósa líka í hinni undankeppninni. En þegar öllu er á botninn hvolft er lagið engan veginn nógu gott.

Tékkland - æfing

Tékkar tefla fram sígauna-rapp-sveitinni Gypsy.cz. Þeir syngja um einhverja ógurlega ofurhetju og hlaupa um sviðið eins og einhverjir bavíanar. Þetta er nú pínu skemmtilegt á sviði en sígaunar hafa aldrei virkað í Eurovision og ég sé þetta ekki virka heldur

Búlgaría - æfing

Ömurlegt lag, vondur söngvari. Á ekki séns. Videoið er samt alveg magnað, mæli með því.

Ég spái því að röðin verði eftirfarandi:
1. Bosnía
2. Tyrkland
3. Armenía
4. Svíþjóð
5. Portúgal
6. Finnland
7. Hvíta-Rússland
8. Ísland
9. Sviss
10.Rúmenía
11.Ísrael
12.Makedónía
13.Malta
14.Svartfjallaland
15.Belgía
16.Andorra
17.Tékkland
18.Búlgaría

En Ísrael fer áfram frekar en Rúmenía sem dómnefnda lag.

Ég kem svo með spá um seinni forkeppnina fljótlega.

• Skrifa athugasemd... (4)

Það er svo sem ósköp lítið að gerast í eurovision málum þessa daganna. Þær þjóðir sem eru að gera eitthvað eru eins og við Íslendingar í einhverjum undankeppnisfasa. Danir eru bara með eina lokakeppni og þeir eru búnir að setja lögin öll á netið og hægt að hlusta á þau á esctoday.com. Þar eigum við líka okkar fulltrúa en Hera Björk syngur lagið Someday. Verð að viðurkenna að þó þetta sé alveg svakalega týpískt eurovision lag þá er þetta nú með betri lögum í dönsku undankeppninni. Flest finnst mér þau annars bara svona la la… reyndar finnst mér danska undankeppnin oftast frekar slök og er yfirleitt ekki að fíla framlag Dananna í keppninni sjálfri.

En þá að íslensku keppninni. Ég klúðraði því að skrifa færslu um síðustu lög en þau má heyra hér:
Páll Rósinkrans - Fósturjörð eftir Einar Scheving
Erna Hrönn Ólafsdóttir - Glópagull eftir Einar Oddsson
Ingó - Undir Regnbogann eftir Hallgrím Óskarsson
Hreindís Ylva Garðarsdóttir Holm - Vornótt eftir Erlu Gígju Þorvaldsdóttur

Það voru löginn Undir Regnbogann í flutningi Ingó veðurguðs og Vornótt í flutningi Hreindísar Ylvu Garðarsdóttur Holm sem fóru áfram. Ég verð nú að vera sammála mati þjóðarinnar varðandi það að tvö bestu lögin fóru áfram en það truflaði mig afskaplega mikið hvað flytjendur þessara laga voru slakir. Ingó er nú kannski ekki besti söngvari í heimi en hann á að geta gert töluvert betur en hann gerði á laugardaginn auk þess sem allt atriðið var bara grátbroslega hallærislegt. Verð nú að segja eins og er að ég hefði frekar viljað sjá Finnboga með túbuna þarna heldur en þessa gellu sem hefur örugglega aldrei haldið á túbu fyrir laugardagskvöldið. Hreindís Ylva er bara 19 ára að ég held og var þarna að flytja lag ömmu sinnar, hinnar tæplega sjötugu Erlu Gígju Þorvaldsdóttur. Hún var augljóslega alveg skelfilega stressuð og flutningurinn á annars mjög sætu lagi var því ekki nógu góður. Páll Rósinkrans flutti sitt lag ljómandi vel en lagið var hreinlega ekki nógu spennandi. Erna Hrönn fær verðlaun fyrir bestu skoruna á kvöldinu en hann var ekki nógu góður til að bæta fyrir slaka lagasmíð.

Og þá að lögunum sem verða flutt næsta laugardag. Lögin sem verða flutt eru:
Kristín Ósk Wium - Close To You eftir Grétar Sigurbergsson
Arnar, Edgar, Sverrir og Ólafur - Easy To Fool eftir Torfa Ólafsson
Seth Sharpe - Family eftir Óskar Pál Sveinsson
Kaja Halldórsdóttir - Lygin ein eftir Albert G. Jónsson

Close To You er lítil sæt djassskotin ballaða sem flutt er að Krístínu Ósk Wium. Til hennar þekki ég lítið en samkvæmt Vísi.is þá hefur hún sungið í Bugsy Malone og syngur nú í fríkirkjukórnum í Hafnarfirði. Sem sagt ekki sjónvarps-vanasta manneskja í heimi en við skölum vona að hún haldi lagi á laugardaginn því að lagið er alls ekkert svo slæmt þó að það sé nú aldrei að fara að gera neina stóra hluti í eurovision.

Easy To Fool er eftir Torfa Ólafsson en hann samdi tvö lög í keppninni fyrir tveimur árum og bæði voru þau arfaslök. Nú leitar hann til Luxor dúettsinss Arnars Jónssonar og Edgars Smára auk þess sem synir Torfa syngja í laginu. Í stuttu máli er þetta hundleiðinleg kántrívella og er ekki að gera neitt fyrir mig.

Seth Sharpe syngur lagið Family. Seth er frábær söngvari en þessi sólarbræla sem hann er að syngja núna gerir frekar lítið fyrir mig. Maður batt nú svolitlar vonir við Óskar Pál, höfund lagsins, eftir að hann var með yfirlýsingar um það hvernig hann tók þátt í að útsetja sigurlag Norðmanna 1995, Nocturne, en hann hefur valdið mér vonbrigðum með sínum lagasmiðum. Fyrra lagið hans í flutningi Jóhönnu Guðrúnar var þó skárra en þetta sem er svona ca. 33 árum of seint til að geta gert einhverjar rósir.

Síðasta lagið, Lygin ein, í flutningi Kaju Halldórsdóttur er svolítið athyglisvert. Ekki beint skemmtilegt en áhugavert. Kaja hefur sungið í ýmsum versló-söngleikjum og gaf víst út plötu árið 2005 sem fór algerlega fram hjá mér. Þetta er nú svona nútímalegast af þessum fjórum lögum og hefur svoltíið kúl takt en það vantar allan krók í það.

Þetta er sem sagt myndarlegast hrærigrautur sem verður boðið upp á á laugardaginn og fjölbreytnin í fyrirrúmi þó að heldur vanti upp á gæðin. Ég spái og vona að Close To You og Lygin ein fari áfram en ég sakna enn lags sem ég hef trú á að geti gert alvöru hluti í Rússlandi í maí en maður vona að lokaundanúrslitakvöldið geri betur en þau fyrstu þrjú.

• Skrifa athugasemd... (7)

Jamm, og jæja… Edgar Smári og Jóhanna Guðrún fóru áfram. Ég átti algerlega von á að Jóhanna Guðrún færi áfram en það glatti mitt gamaldags og rómantíska hjarta að Edgar Smári skyldi fylgja henni. Annars er ósköp lítið um þessa keppni að segja, mér þótti það reyndar miður að þetta væri ekki í beinni útsendingu og þar með gat maður ekki dæmt flutninginn á sviðinu og því veit maður ekki nákvæmlega hvað maður var að kjósa.

Annars bíður maður bara spenntur eftir næsta lagaskammti. Góðar stundir

• Skrifa athugasemd... (0)

Á morgun laugardaginn 10. janúar verður fyrsta undanúrslitakvöldið í Söngvakeppni Sjónvarpsins eða forkeppni Eurovision haldið. Búið er að gera þessi fyrstu fjögur lög sem keppa opinber á vef sjónvarpsins. Ég ætla að fjalla hér örstutt um þessi lög en set þó fyrirvara um að skoðanir mínar geta breyst eftir flutninginn á laugardagskvöldið.

Dagur nýr

Lag: Halldór Guðjónsson
Texti: Íris Kristinsdóttir (úr Buttercup / Ber)
Flytjandi: Heiða Ólafs (a.k.a. Heiða Idol)

Þetta er svona svakalega hefðbundin ballaða, kannski örlítið út í powerballöðu stílinn. Minnir mig svolítið á Heaven sem Jónsi söng í keppninni 2004 en mér fannst það lag betra, fyrir utan fyrsta tóninn hans Jónsa, já og nokkra þar á eftir. Þetta lag er aftur á móti að gera voðalega lítið fyrir mig, þetta er ekkert vont en ekkert svakalega gott heldur. Alla veganna þarf flutningurinn á laugardagskvöldið að vera alveg rosalega góður ef þetta ætlar að fá mitt atkvæði.

Hugur minn fylgir þér

Lag: Valgeir Skagfjörð
Texti: Valgeir Skagfjörð
Flytjandi: Ólöf Jara Skagfjörð

Það má í raun segja það sama um þetta lag og það fyrra. Þetta er svo sem ósköp sætt og fallegt, það er ekkert vont en vantar svona meiri kraft og krók til að grípa mann. Þetta er svona mini útgáfa af laginu sem Regína Ósk söng árið 2006 en engan veginn eins gott. Það er 19 ára verzlómær sem syngur lagið og gerir það svo sem ágætlega en maður hefur alltaf efasemdir um svona unga og óreynda flytjendur þegar þeir stíga á stóra sviðið hérna heima, hvað þá á stóra sviðið í Moskvu.

Is It True

Lag: Óskar Páll Sveinsson
Texti: Óskar Páll Sveinsson
Flytjandi: Jóhanna Guðrún Jónsdóttir

Þetta er lagið sem virðist heilla eurovisionnörda Evrópu mest af þessum fjórum og sumir þeirra nota mjög sterk og jávkæð lýsingarorð í því samhengi. Þetta er alveg ábyggilega það sem er svona nútímalegast af þessum lögum og sennilega það lag af þessum fjórum sem á besta möguleikann á að gera eitthvað af viti í Moskvu. Sjálfur er ég samt ekki alveg að kaupa það, mér finnst vanta svolítinn kraft í það. Eftir að vera búinn að hlusta á það nokkrum sinnum er einhvern veginn ekkert sem stendur eftir. Ég tel samt að þetta lag ætti að vera nokkuð öruggt upp úr þessum undanúrslitariðli og baráttan muni standa á milli hinna laganna um hitt lausa sætið í úrslitunum

The Kiss We Never Kissed

Lag: Heimir Sindrason
Texti: Ari Harðarson
Flytjandi: Edgar Smári

Kannski er ég svona gamaldags en fyrir mína parta finnst mér þetta besta lagið í keppninni. Þetta er allt annað en nútímalegt lag og engan veginn klassískt eurovision lag en það er eitthvað heillandi við það. Í þessari útgáfu finnst mér Edgar Smári skila þessu lagi ljómandi vel en ég hef svolitlar efasemdir um hann á sviðinu því mér finnst hann stundum verða svolítið skjálfandi á beinunum samanber þegar hann tók þátt 2006. Hins vegar fannst mér hann töluvert betri í fyrra og vonandi að hann standi sig í ár. Svo er gaman að segja frá því að lagahöfundurinn er bróðir eyrnalæknisins míns og tengdapabbi vinnufélaga míns þannig að það sjá það allir að við erum nátengdir þannig að þetta er engan veginn hlutlaust mat hjá mér.

• Skrifa athugasemd... (1)

Sæl verið þið öll og gleðilegt ár. Nú ætla ég að gera þriðju tilraunina við eurovision upphitunina. Síðustu tvær hafa verið frekar endaslepptar og skýrist það í fyrra þannig að við konan þurftum að fara með stelpuna okkar á spítala til Boston í apríl og þá datt þetta alveg upp fyrir hjá mér. En eins og áður segir ætla ég nú að gera þriðju tilraunina til að halda þetta út til enda.

Tvö lög hafa nú þegar verið kynnt, Albanir eru að venju fyrstir til að kynna sitt lag og Tyrkir sýndu sitt lag í fyrsta sinn á nýársdag. Þar að auki hafa Grikkir tilkynnt að Sakis Rouvas muni taka þátt fyrir þeirra hönd og Bretar hafa ákveðið að enginn annar en Sir Andrew Loyd Webber muni semja framlag Breta. Breski flytjandinn verður valinn í einhvers konar “Idol” þætti og mun Webber semja lagið sérstaklega fyrir sigurvegarann. Hollendingar hafa svo ákveðið að De Toppers muni flytja framlag þeirra en þetta ku vera vinsæl hljómsveit í Hollandi sem er þekktust fyrir að spila ABBA lög. Síðast en alls ekki síst munum við Íslendingar svo byrja á okkar forkeppni núna næsta laugardag.

Albanía

Albanir héldu undankeppni og sigurvegarinn var 16 ára stúlka, Kejsi Tola sem söng lagið Më mërr në ëndërr. Lagið er samið af Edmond Zhulali og Agim Doçi það eru þeir sömu og stóðu á bak við lagið Image Of You sem náði í 7. sætið árið 2004 á fyrsta ári Albaníu í Eurovision en það er enn besti árangur þeirra í keppninni. Lagið þeirra í ár er svona tiltölulega hefðbundið europop með balkönskum áhrifum. Það á þó eitthvað eftir að breytast þar sem útgáfan sem sigraði keppninna er fjögurra mínútna löng og sungin á albönsku en lokaútgáfan mun verða þýdd yfir á ensku og geri ég ráð fyrir að lagið muni batna við báðar þessar breytingar. Annars finnst mér þetta laga bara alveg allt í lagi og það venst ágætlega. Árangurinn mun hins vegar örugglega velta á því hversu vil hin unga Kejsi Tola mun þola pressuna við að standa á stóra sviðinu í vor.

Tyrkland

Tyrkir fara eins og Albanir nokkuð fjölfarna leið og blanda saman Helenu Paparizou, Sertab Erener og Beyoncé og út kemur Hadise með lagið Düm Tek Tek sem hefur einnig verið kallað Crazy for you. Hadise þessi er 23 ára belgísk stúlka af tyrkensku bergi brotin og er velþekkt tónlistar- og sjónvarpskona bæði í Belgíu og Tyrklandi. Hún mun verða fyrsti keppandi Tyrklands sem ekki er fædd í Tyrklandi. Þetta lag er alveg allt í lagi en er þó ekki alveg minn tebolli en mun hins vegar alveg 100% öruggt komast upp úr undankeppninni og mér finnst alls ekkert ólíklegt að þetta eigi eftir að blanda sér í toppslaginn, bæði vegna þess að þetta er Tyrkland sem fær alltaf fullt af atkvæðum frá öllum Tyrkjunum sem eru búsettir um alla Evrópu og vegna þess að þetta er svona tónlistarstíll sem virðist höfða til ansi margra. Það er þó ómögulegt að segja um það áður en maður heyrir fleiri lög.

Að lokum ætla ég svo að stikla á stóru um helstu viðburði í dagskrá næstu vikna:
10. jan. 2009: Íslendingar hefja sína undankeppni.
24. jan. 2009: Norðmenn hefja sína undankeppni.
31. jan. 2009: Lokakeppnin í Danmörku.
31. jan. 2009: 2. undankeppnin í Noregi.
31. jan. 2009: Bretar velja flytjandann sinn. Lagið verður samið síðar.
31. jan. 2009: Lokakeppnin í Finnlandi, Slóveníu og Rúmeníu.
1. feb. 2009: Lokakeppnin í Hollandi. Flytjandi hefur verið ákveðinn.
7. feb. 2009: 3. undankeppnin í Noregi.
7. feb. 2009: 1. undankeppnin í Svíþjóð.
7. feb. 2009: Lokaúrslit í Möltu og Kýpur.
14. feb. 2009: Lokaúrslit á Íslandi.
14. feb. 2009: 2. undankeppnin í Svíþjóð.
14. feb. 2009: Lokaúrslit í Póllandi.
20. feb. 2009: Lokaúrslit í Írlandi.
21. feb. 2009: Lokaúrslit í Noregi, Búlgaríu og Makedóníu.
21. feb. 2009: 3. undankeppnin í Svíþjóð.
22. feb. 2009: Lokaúrslit í Úkraínu.
27. feb. 2009: Lokaúrslit í Portúgal.
28. feb. 2009: 4. undankeppnin í Svíþjóð.
28. feb. 2009: Lokaúrslit í Króatíu og Lettlandi.
1. mar. 2009: Lag Bosníu & Herzegovínu kynnt.
7. mar. 2009: Andra chansen í Svíþjóð.
7. mar. 2009: Lokakeppnin í Eistlandi.
8. mar. 2009: Lokakeppnin í Serbíu og Slóvakíu.
14. mar. 2009: Lokakeppnin í Svíþjóð.
12. maí 2009: Fyrra undanúrslitakvöld Eurovision.
14. maí 2009: Seinna undanúrslitakvöld Eurovision.
16. maí 2009: Lokakeppni Eurovision.

• Skrifa athugasemd... (0)

Jæja… hér koma nokkur lög í viðbót… Hér ætla ég að fjalla um þrjú af þeim lögum sem þykja líkleg til að standa sig vel í keppninni í maí.

Svíþjóð

Svíar voru eins og oft áður síðastir til að tilkynna sitt lag til þátttöku. Að mínu mati var nokkuð ljóst að baráttan stæði á milli tveggja laga, annars vegar BWO með lagið Lay Your Love On Me sem var mitt uppáhald og svo Selmubanans Charlotte Perelli sem söng lagið Hero. Það kom mér hins vegar mjög á óvart að það var hvorugt þessara laga sem fékk flest atkvæði frá almenningi heldur var það blondínan Sanna Nielsen sem söng ballöðuna Empty Room. Það dugði þó ekki til þar sem Charlotte var með mikla yfirburði í dómnefndarkosningunni og lenti í öðru sæti í almenningskosningunni. Lagið, Hero, er svona klisjukent sænskt ABBA-popplag með sterkum krók, samið af þeim Bobby Ljunggren og Fredrik Kempe en báðir eru þeir reynslumiklir Eurovision keppendur. Bobby hefur þrisvar sinnum unnið Melodifestivalen, 1995, 1998 og 2006 samdi hann lagið hennar Carolu, Invincible. Fredrik hefur tvisvar sinnum tekið þátt í Melodifestivalen sem flytjandi og í fyrra samdi hann þrjú lög sem flutt voru af öðrum flytjendum. En að framlaginu í ár þá er ég nokkuð viss um að þetta á eftir að komast í gegnum undankeppnina og sennilega lenda einhvers staðar á topp 10 en ég á ekki von á að þetta eigi eftir að blanda sér í baráttu um sigurinn. Sjálfur er ég ekkert ýkjahrifinn af þessu lagi, mér finnst þetta allt of mikið formúlulag en þess ber þó að geta að keppnin í ár stefnir í að verða langt undir meðallagi. Svíar taka þátt í seinni undankeppninni

Rússland

Það er gamall kunningi sem keppir fyrir Rússa í ár, en það er enginn annar en sjálfur Dima Bilan sem lenti í öðru sæti 2006 með lagið Never let you go. Lagið nú er mjög svipað og laginu frá tveimur árum en ekki alveg eins gott en á þó örugglega betri séns á sigri þar sem keppnin í ár er ekki eins sterk. Dima Bilan er náttúrulega rosalega stór stjarna í Rússlandi og öllum fyrrum Sovíetríkjunum og á örugglega eftir að fá 10 eða 12 stig frá þeim öllum. Og ef marka má framlagið frá 2006 þá er hann náttúrulega rosalega flottur performer og á ekki eftir að tapa stigum á sviðsframkomunni. Enda hefur Rússland verið sett sem líklegasti sigurvegarinn hjá veðbönkunum. Rússar keppa í fyrri undankeppninni.

Serbía

Serbar eru á heimavelli í ár og það er nokkuð ljóst að þeir ætla ekki að slaka neitt á í keppninni því nú senda þeir enn eina gullfallega ballöðuna sem er sungin af Jelenu Tomašević og samin af engum öðrum en Željko Joksimović sem verður að segjast eins og er að er sennilega allra besti lagahöfundur sem tekið hefur þátt í Eurovision. Jelena og Željko hafa áður starfað saman og tóku meðal annars þátt í forkeppni Serbíu og Svartfjallalands árið 2005 og olli það miklum deilum á milli Serbíu og Svartfjallalands þegar þau lentu í öðru sæti í forkeppninni það árið. Þar að auki tók Željko náttúrulega þátt sem flytjandi og lagahöfundur árið 2004 með hið frábæra lag Lane moje. Svo samdi hann lagið Lejla sem lenti í þriðja sæti fyrir Bosníu & Herzegóvínu árið 2006. Ef menn gefa sér tíma í að hlusta á þessi frábæru lög þá þarf ekkert að fjölyrða frekar um það hvílíkur snillingur er þarna á ferð og ég ætla að spá því hér og nú að Serbía muni sigra keppnina annað árið í röð. Það er eingöngu tvennt sem getur komið í veg fyrir það, annars vegar ef að gamla Sovíetblokkin sem er örlítið stærri en Balkanblokkinn hefur betur í sínum innbyrðisatkvæðagreiðslum sem mun verða til þess að Rússar sigri keppnina og hins vegar að fólk sé búið að fá algerlega nóg af þessu og muni kjósa Írland til þess að gefa svona stórt frat í keppnina og Írar muni þá vinna. En spá mín stendur og ég vona ynnilega að Serbar sigri keppnina í ár. Það gæti þó unnið gegn Serbum að þeir keppa eingöngu í aðalkeppninni og njóta því þess ekki að heyrast tvisvar eins og hin lögin.

• Lesa athugasemdir... (8)

Úff púff… nú er maður bara farinn að skammast sín fyrir framtaksleysið. Því miður hefur verið allt of mikið að gera hjá mér og hefur þessi bloggsíða borið keim af því. Ég hef áður lofað bót og betrun og svikið það jafnharðan, þannig að það er sennilega best að lofa sem minnstu núna en ég ætla að reyna að ná að covera öll lögin fljótlega. Nú eru allar þjóðir nema Svíar búnar að tilkynna sín lög og Svíar ljúka sinni undankeppni á laugardag. En hér koma sem sagt nokkur lög til viðbótar.

Ísrael

Það er Bo’az Ma’uda sem syngur framlag Ísraela í keppninni í ár. Bo’az er tvítugur og sigraði í fimmtu seríuni af ísraelska Idol-inu, Kokhav Nolad. Bo’az söng fimm lög í ísralsku úrslitakeppninni og það var lagið Ke’ilo kan sem sigraði. Þetta lag er samið af engri annarri en sjálfri Dönu International. Það verður ekki tekið af Bo’az að hann hefur mjög flotta rödd en þetta lag er engan veginn að ná til mín, allt of leiðinlegt og varla nein melódía. Það er eins og þessi keppni ætli algerlega að fyllast af svona leiðinlegum og óáhugaverðum ballöðum og Ísraelar falla beint í þann pyttinn. Ísraelar keppa í fyrri undankeppninni.

Grikkland

Grikkir hafa gert góða hluti í keppninni undanfarin fjögur ár og aldrei lent neðar en 9. sæti og unnu keppnina 2005; í raun eru þeir eina þjóðin sem hefur alltaf endað í topp 10 eftir að undankeppnin var tekin upp. Nú reyna þeir aftur að feta í sömu fótspor og 2005 og tefla fram ekkert allt of ljótri skvísu (eins og einhver orðaði það, vona að ég verði ekki kærður fyrir ritstuld) í stuttu pilsi með fjóra karldansara. Lagið er þó engan vegin eins gott og hjá henni Helenu Paparizou en er þó alls ekki versta lagið í keppninni í ár og ættu að komast upp úr fyrri undankeppninni.

Finnland

Finnar eru enn ein þjóðin sem telja sig hafa fundið einhverja sigurformúlu eftir að hafa unnið keppnina. Þeir halda sig því í þungarokkinu og tefla nú fram hljómsveitinni Teräsbetoni sem flytur lagið Missä miehet ratsastaa. Þessi hljómsveit er einhvers konar furðuleg blanda af Lordi án búninganna og Wig Wam. Frekar kostulegt lið og lagið er bara alveg allt í lagi þegar maður er búinn að hlusta á það nokkrum sinnum. Hins vegar er alveg ómögulegt að segja til um það hvort þetta er að heilla Evrópu. Það nýtur þess þó vera í fyrri undankeppninni og fær þar örugglega atkvæði frá Eistum og Norðmönnum en hvort það dugar er erfitt að segja.

• Lesa athugasemdir... (6)

Írland

Oftast er það þannig að það er eitthvað eitt atriði sem er svona mestur fjölmiðlasirkus í kringum á keppninni í sjálfri; 2006 var það Sylvía Nótt, 2007 var það Verka frá Úkraínu en í ár er nokkuð ljóst að Írar munu taka það hlutverk að sér. Ýmis fyrirbæri hafa nú verið send, til dæmis pappírspési, klæðskiptingar, kynskiptingar, trommandi ömmur en aldrei átti ég von á að einhver þjóð yrði svo desperat að senda kalkúnabrúðu en það er einmitt það sem Írar gera í ár. Dustin the Turkey sem syngur lagið Irelande Douze Pointe er vinsæl fígúra þarna í Írlandi sem spratt upp úr barnaefnisþætti en er orðin meiri svona brandarafígúra fyrir fullorðna og er með sinn eigin sjónvarpsþátt og er örugglega allra góðra gjalda verður sem slíkur. En hvað í andsk… er þetta gerpi að gera í Eurovision? Í raun er þetta bara feit langatöng upp í loftið til Eurovision keppninnar frá Írum. Hún Dana (ekki sú alþjóðlega heldur sú sem vann keppnina fyrir Írland 1970) hefur haft nokkuð hátt um það að henni finnist að ef Írar ætli ekki að taka þessa keppni alvarlega geti þeir allt eins dregið sig úr keppninni. Mér finnst í góðu lagi að gera nett grín að þessari keppni en er þetta ekki einum of langt gengið. Ég skal þó alveg viðurkenna það að textinn í þessu lagi er nú með þeim fyndnari, töluvert fyndnari en Silvía Nótt og We Are The Winners. Hér á eftir koma þrjú brot úr textanum:

  Drag acts and bad acts and Terry Wogan’s wig
  Mad acts and sad acts, it was Johnny Logan’s gig

  Give us another chance, we’re sorry for riverdance
  Sure Flately he’s a yank
  And the Danube flows through France
  Block voting, shock voting
  Give your 12 today
  You’re all invited to Dublin Ireland
  And we’ll party the Shamrock way

  Eastern Europe we love you
  Do you like Irish stew?
  Or goulash as it is to you?

Ekki neita ég því að þetta er fyndið og allt það en ó mæ god hvað þetta lag er leiðinlegt. Þetta er svona lag sem fólk annaðhvort hatar eða elskar. Nánast allir eurovisionnördar gjörsamlega þola það ekki. Ég er kannski ekki alveg svo afdráttarlaus í mínum skoðunum enda finnst mér textinn mjög fyndinn en á heildina litið finnst mér þetta ekki gott. Írar taka þátt í fyrri undankeppninni.

Búlgaría

Búlgörum hafði gengið hálfilla fyrstu tvö árin sem þeir tóku þátt í eurovision. Í fyrra hittu þeir hins vegar á formúlu sem gekk vel hjá þeim með danssmellinum Voda og enduðu í fimmta sæti. Í ár róa þeir svona um það bil á sömu mið en það er hljómsveitin Deep Zone & Balthazar sem flytur lagið DJ Take Me Away. Þetta er alveg ágætis smellur sem minnir mig á svona mellóv útgáfu af gamla Prodigy smellinum Out of Space án þess þó að vera á nokkurn hátt að saka þá um lagastuld. Mér finnst líklegt að þetta gæti verið að keppa við okkur um dans-klúbba-atkvæðin. Svo gæti enn harðnað á þeim dalnum ef Svíar kjósa Bodies Without Organs út líka en þeir tóku þátt í síðasta þætti í Melodifestivalen og verð ég nú að skrifa þá sem ansi líklega. Búlgarar keppa í seinni undankeppninni eins og Íslendingar og Svíar.

Pólland

Fyrir umfjöllun um þetta lag má bara lesa umfjöllunina um Ungverjaland. Þetta er eins og það nema bara aðeins verra. Pólverjar tefla fram hinni 35 ára gömlu Isis Gee sem heitir réttu nafni Tamara Gołębiowska. Hún er fædd í Seattle í Bandaríkjunum, fæðingarnafnið hennar var reyndar Tamara Diane Wimer en tók upp þetta pólska eftirnafn 2004 þegar hún giftist eiginmanni sínum og fluttist til Póllands 2004. Eurovision-aðdáendur virðast vera nokkuð sáttir við þetta lag en ég er ansi hræddur um að þetta muni detta í sama flokk og Holland frá 2005 og gleymast. Það vinnur þó með laginu að vera í fyrri undankeppninni því miðað við þau lög sem núna eru komin fram virðist sú keppni vera töluvert slakari.

Rúmenía

Í fyrra gekk Lettum ágætlega með lag sungið á ítölsku og komust upp úr undankeppninni. Og viti menn nú eru strax komin tvö lög flutt á ítölsku. Það er svo sem ekkert óeðlilegt að Sviss velji að syngja á ítölsku enda eitt fjögurra opinberra tungumála þar og rúmenska er nú mjög skyld ítölskunni þannig að þeir hafa kannski ekki langt að sækja það. Það eru þau Nico og Vlad Miriţă sem flytja framlag Rúmena. Þetta er svona óperuskotið ítalskt dægurlag, minnir svolítið á Andrea Bocelli. Mér finnst Vlad mjög góður en hún Nico fer svolítið í pirrurnar á mér. Annars er þetta alveg ágætislag þó að ég fíli það svissneska töluvert betur. Rúmenar keppa í fyrri undankeppninni og verð ég nú að telja þá nokkuð líklega til að komast áfram.

Króatía

Undankeppnin hjá Króötum var vægast sagt umdeild. Það voru götulistamennirnir Kraljevi Ulice og 75 Cents sem sigruðu Antonija Šola. Þessi tvö atriði fengu jafnmörg stig samanlagt frá dómnefnd og í símakosningu. En í Króatíu gildir sú regla að séu tvö atriði með jafnmörg stig þá vegur dómnefndin þyngra. Og það er náttúrulega segin saga að almenningur í Króatíu og eurovision nördar um alla Evrópu eru ekki par sáttir við Króatíska framlagið. Sjálfur er ég bara nokkuð ánægður með þetta lag og finnst gamli kallinn þarna, 75 Cents, ógeðslega flottur. Ég viðurkenni þó að hún Antonija hefði sennilega gert betri hluti þarna úti og fengið fleiri nágrannaatkvæði heldur en Kraljevi Ulice eiga eftir að fá. Ég fíla samt þessa kalla, þeir voru bara mættir út á torgið sitt í Zagreb tveimur dögum eftir að þeir unnu keppnina og spilu þar eins og þeir hafa gert hvern dag undanfarin ár. Þeir eiga sér líka smá historíu í króatísku undankeppninni en þeir hafa lent í öðru sæti síðustu tvö ár þannig að það var alveg kominn tími á að þeir vinni. Króatar keppa í seinni undankeppninni.

Makedónía

Tamara, Vrčak and Adrian Gaxha taka þátt í Eurovision fyrir hönd Makedóna með laginu Vo Ime Na Ljubovta eða Í nafni ástarinnar. Makedónar hafa oft verið þekktir fyrir að vera ekki með neitt rosalega góð lög en komast samt alltaf upp úr forkeppninni. Það gengur yfirleitt sú saga um Makedóníu syndrómið að þegar maður er farinn að fíla makedónska lagið er maður búinn að hlusta of mikið á lögin. Ég hef oftast komist á það stig að fíla makedónska lagið en ef ég kem til með að gera það í ár viljið þið sem kallið ykkur vini mína þá banka í mig. Þetta lag er hreinasti horbjóður sem nokkurn tímann hefur komist í Eurovision. Þetta er fjórfalt vera en Svartfjallaland í fyrra. Makedónar keppa í sterkari undankeppninni, þeirri seinni þannig að ég neita að trúa því að þeir komist upp úr undankeppninni í ár.

Nú eru eingöngu þrjú lög af þeim sem hafa komið fram sem eiga eftir að fá umfjöllun. Ég ætla að geyma aðeins meiri umfjöllun um Íslenska lagið þar til maður sér hvaða lög það keppir við og geta þá betur metið það hvaða möguleika það á á því að komast áfram. Hins vegar stefni ég á að koma með smá umfjöllun um hin tvö, Ísrael og Grikkland fljótlega auk þess sem Georgía, Lettland og Finnland ákveða sig á morgun og Bosníumenn á sunnudaginn. Þannig að það er nóg framundan.

• Lesa athugasemdir... (7)

Eins og ég hef sagt skulda ég ansi margar umfjallanir um þau lög sem hafa verið tilkynnt til þátttöku. Hér koma nokkrar.

Azerbaidjan
Azerbaidjan tekur þátt í Eurovision í fyrsta sinn í ár og þeir byrja með hvelli. Þetta er eitthvað það furðulegasta lag sem heyrst hefur í Eurovision. Það var hinn tvítugi Elnur Huseynov sem var valinn til að taka þátt. Elnur er hins vegar svolítil stjarna og hann neitaði að taka þátt nema hann fengi að syngja lagið sem dúett með vini sínum, Samir Javadzadeh. Lagið fjallar um baráttu góðs og ills þar sem Elnur leikur engilinn en Samir djöfullinn. Í þessu lagi syngur Samir einhvern þjóðlegan stíl sem er kallaður Mugham en þá þurfa flytjendur víst að flytja allar sínar tilfinningar í sönginn og tónlistina. Mjög spes og sennilega ekki alveg að ná til Vestur-Evrópubúa. Það kæmi mér alla veganna verulega á óvart ef við þyrftum að hlusta á þetta lag í úrslitunum. Þó skal maður ekkert fullyrða, lagið á víst eftir að taka töluverðum breytingum og verður hluti lagsins sunginn á azerbaidjanísku (eða hvað sem tungumál þeirra heitir) auk þess sem þessi mugham hluti lagsins verður lengdur. Þetta verður fróðlegt. Azerar keppa í fyrri undankeppninni og því getum við því miður ekki kosið þetta lag.

Ungverjaland
Ungverjar senda hina 28 ára gömlu Csézy í keppnina ár. Hún sigraði undankeppnina í Ungverjalandið með miklum naumindum en þar söng hún lagið Szívverés sem þýðir hjartsláttur. Hún hlaut flest stig í símakosningu en varð í öðru sæti hjá dómnefnd og var því jöfn stigum lagsins sem fékk flest stig frá dómnefndinni. Hjá Ungverjum vó hins vegar atkvæði þjóðarinnar þyngra heldur en atkvæði dómnefndarinnar og því komst hún í lokakeppnina. Þetta er svona lítið sætt lag en alveg svakalega auðgleymanlegt. Ég tel alla veganna ekki mjög líklegt að maður eigi eftir að fá þetta lag á heilann á næstunni. Csézy hefur gefið það út að lagið muni verða flutt á ensku í úrslitakeppninni og held ég að það muni nú hjálpa því en hversu mikið á eftir að koma í ljós. Lagið mun heita Candlelight og keppir í seinni undankeppninni.

Moldavía
Fulltrúi Moldavíu verður Geta Burlacu en hún er 33 ára og þekkt jazz söngkona í Moldavíu. Menn tala um þetta sem þessa-ár-”Love or leave” sem var framlag Litháens í fyrra. Alveg vel hlustandi á þessi lög en svakalega auðgleymanleg og ekki miklar líkur á að þeir muni hrúga til sín stigunum. Moldavar eru þó heppnir að þeir lenda í fyrri undankeppninni eins og nágrannarnir Rúmenar og geta því væntanlega treyst á 12 stig þaðan en ég á ekki von á því að það dugi til. Anna Rósa (dóttir mín) mundi þó örugglega verða hrifin af stelpunni sem gengur þarna um sviðið og blæs sápukúlur.

Noregur
Norðmenn halda alltaf mjög stóra og flotta undankeppni en það virðist vera mikill skortur á góðum lagahöfundum hjá þeim því lögin eru oftast mjög slök. Þeim tókst þó að hitta á um það bil eina lagið í ár sem var hlustandi á. Ekki kannski minn tebolli en á örugglega eftir að fá eitthvað af atkvæðum. Þetta minnir svolítið á Britney Spears meðan hún var enn þá saklaus skólastelpa en Maria Haukaas Storeng sem flytur framlag Noregs er eitthvað reyndari en Britney var þá. Hún hefur tekið þátt í nokkrum söngleikjum allt frá því að hún söng hlutverk Annie í söngleiknum Annie árið 1991. Hún tók svo þátt í norska Idolinu árið 2004 og varð þar í sjötta sæti. Norðmenn eru nokkuð óheppnir með það að þeir og Finnar eru einu Norðurlandaþjóðirnar sem keppa í fyrri undankeppninni og þar má gera ráð fyrir að u.þ.b. 30 stig fari í súginn því Svíar, Danir og Íslendingar hafa oftast verið duglegir að gefa Norðmönnum stig. Lögin í fyrri undankeppninni eru þó í heildinna slakari heldur en í þeirri seinni þannig að það dugar kannski til en ég mundi ekki veðja mjög stórum fjárhæðum á það.

Tyrkland
Tyrkir hafa átt góðu gengi að fagna allt síðan þeir unnu keppnina árið 2003 og aldrei lent neðar en 13 sæti og alltaf tekið þátt í aðalkeppninni enda geta þeir treyst á ansi marga Tyrki sem eru búsettir víðs vegar um Evrópu. Fulltrúar Tyrkja í ár eru rokkararnir í Mor ve Ötesi sem munu syngja lagið Deli sem útleggst geðveikur á hinu ástkæra ylhýra. Að mínu mati er þetta mjög þétt og flott rokklag sem á örugglega eftir að enda ofarlega. Vandamál þess gæti þá helst verið að fyrir svona eurovisionnörda eins og mig þá er þetta kannski ekki alveg að heilla mann við fyrstu heyrn en eftir nokkur skipti er þetta orðið fínasta lag. Mor ve Ötesi hefur starfað síðan 1995 og hefur notið mikilla vinsælda í Tyrklandi, einkum eftir að þeir gáfu út sína aðra plötu árið 1999. Harun Tekin sem er söngvari og gítarleikari hljómsveitarinnar hefur getið sér gott orð fyrir að vera mikill talsmaður friðar og er útskrifaður með tvær háskólagráður, í heimspeki og sálfræði.

• Lesa athugasemdir... (5)

Þetta kom svona nett á óvart að Regína Ósk og Friðrik Ómar hafi tekið massana í Merzedes Club. Hér koma nokkrir punktar frá keppni gærkvöldsins:

• Nýja útgáfan af laginu Fullkomið líf var að mínu mati betri en orginallinn. Flutningurinn var jafnframt mjög góður eins og við var að búast. Myndvinnslan fannst mér svolítið klúðursleg, til dæmis þegar dansararnir rifu sig úr pilsunum var myndavélin alveg í klósöppi á Friðriki Ómari og maður rétt sá þær henda frá sér pilsunum í bakgrunni. Vonum að þetta verði betur unnið í vor. Annars var þetta allt í lagi, lagið er ekki að gera neitt sérstakt fyrir mig en þetta virðist njóta töluverðrar hylli á meðal Eurovision aðdáenda og satt best að segja hef ég ekki séð neitt lag fá svona góða umfjöllun í ár. Meðal umsagna af síðunni ESCToday:
  • “The english version is way better than the icelandic. I quite like it!”
  • “This is a great song. It will really close for the 1st place in ESC 2008. Good luck to Regína & Fridrik. They deserve it. =) “
  • “Their live performance!!! GREAT!!!!!”
  • “i think the performance in the final was much better than the semi final too. i really like this song . its very eurovision, and very catchy. i just hope it qualifies “
  • “Excellent choice Iceland - Reykjavik 2009??”
  • “just one word for this….WOW

    I LOVE IT!!

    REYKJAVIK 2009

    Craig, UK”

  • “Well done Iceland, your best song and performance in many years, and among the top best songs this year (very bad year by the way ”
  • “wow, ive just watched the final performance of this song, loved it. she looks great, an improvement from the semi’s fasion!
    he’s sexy…yum…hehehe.
    great performance, now i just hope they can pull it off on the night (S).
    good luck iceland…..my winner”
  • En vissulega eru ekki allir jafnkátir: “Horrible dated eurodance. Don’t like it.” En á heildina litið eru þeir neikvæðu mun færri.
• Merzedes Club voru greinilega ekki sáttir með annað sætið. Vissulega var þetta óþarfa komment hjá Friðriki Ómari þarna upp á sviði að vera að skjóta eitthvað á þá en staðreyndin var bara sú að þrátt fyrir að atriðið hafi verið mjög skemmtilegt þá var söngurinn bara hreinlega ekki nógu góður. Hann var reyndar töluvert betri en í undanúrslitunum (hann gat nú ekki versnað mikið) en það hreinlega gengur ekki að syngja svona hrikalega falskt, sérstaklega byrjaði hún illa en náði sér svo aðeins á strik en það var bara too little too late. Massarnir á trommunum héldu hins vegar “Ho ho ho”-línunni algerlega og stóðu sig mjög vel. Allmennt virðast Eurovision nördarnir samt vera mjög ánægðir með að þetta lag er ekki að fara út. Það verður víst nóg af þessum djókatriðum í vor.
• Ragnheiður Gröndal var góð og kaus ég hana. Mér fannst hins vegar atriðið betra í undanúrslitunum. Þetta var svona svolítið eins og hún gæti ekki ákveðið sig hvernig hún ætlaði að hafa atriðið, hvort hún ætlaði að sitja, standa eða liggja, hvort hún ætlaði að vera úti eða inni eða hvað. En lagið var smart og söngurinn góður.
• Dr. Spock eru ógðeðslega fyndnir og góður húmor að syngja viðlagið á serbnesku en eins og ég hef sagt áður þá finnst mér lagið bara vera hávaði.
• Magni og Birgitta og Páll Rósinkrans lenda í sama flokki, fínn flutningur á frekar leiðinlegum lögum.
• Davíð Olgeirs var mjög góður og lagið hans er skemmtilegt en einhvern veginn hafði maður það á tilfinningunni að hann ætti aldrei séns
• Baggalútur er svo náttúrulega bara alger snilld. Hefði verið flott að senda Hófí til Serbíu

Þetta er svona það helsta. Það var nóg að gerast í öðrum keppnum og eins og sagði í síðustu færslu er ég farinn að skulda ansi margar umfjallanir. Geri ráð fyrir að reyna að bæta úr því í vikunni.

• Skrifa athugasemd... (3)

Assgoti hafa menn (ég) verið slakir að undanförnu í blogginu. Það vill þó til að það hefur verið frekar rólegt að gera að undanförnu. Um síðustu helgi var til dæmis bara Tyrkland sem tilkynnti lag til þátttöku en helgina á. Og Carola virðist vera dottin úr tísku í Svíþjóð. Henni mistókst alla veganna ásamt Andreas Johnson að komast áfram í úrslitakeppnina í Svíþjóð og þarf því að taka þátt í andra kansanum ætli hún sér að komast til Globen.

Helgina áður voru líka nokkur lög tilkynnt. Ég er því farinn að skulda nokkrar umfjallanir og kynningar og mun ég reyna að taka mig á í þeirri deildinni eftir helgi. Nú fer hins vegar að styttast í stóru stundina hjá okkur Íslendingum því úrslitakeppnin fer að sjálfsögðu fram á laugardaginn. Þar er helst talið að valið standi á milli Merzedes club og Eurobandsins en það er aldrei að vita, Ragnheiður Gröndal kom mér verulega á óvart og tryggði sér sæti í úrslitunum með skemmtilegri sviðsetningu og góðum flutningi á alveg ágætis lagi. Nú ætla ég að renna einu sinni enn yfir lögin sem keppa á laugardaginn. Sigurlíkurnar sem ég læt fylgja þarna með eru huglægt mat mit. Komið endilega með í commentunum hvaða lag þið haldið að sigri eða vonið að sigri.

Gef mér von

Flytjandi: Páll Rósinkrans
Höfundur: Guðmundur Jónsson
Þetta er annað af tveimur lögum í úrslitunum sem mér finnst hreint út sagt leiðinlegt. Það er ekkert í þessu lagi. Ég man nú ekki alveg hvernig þetta var flutt, þ.e. hversu margar bakraddir hann notaði, í undanúrslitunum en ég geri ráð fyrir að núna megi hann ekki nota nema 5 bakraddir og spurning hvort lagið minnki bara ekki enn þá meira við það og ekki var það nú stórt fyrir. Ég get alla veganna alveg garanterað að þetta lag á ekki nokkurn möguleika á sigri.
Sigurlíkur: 0%

Núna veit ég

Flytjandi: Magni Ásgeirsson (og Birgitta Haukdal)
Höfundur: Hafdís Huld Þrastardóttir
Ég hef ekkert heyrt um það hvort Birgitta komi aftur til að syngja þetta lag í úrslitunum. Mér fannst þeir spekingar í þættinum bara vera ánægðari með lagið án Birgittu. Ég sá nú engan gígantískan mun á útsetningunni fyrir utan það að Magni fékk að þenja sig ansi hressilega í lokin þegar Birgitta var ekki með. Í heildina finnst mér þetta bara hálfmisheppnuð eurovision ballaða. Fyrir 5 árum síðan hefði Birgitta sungið hvaða lag sem var og sigrað keppnina með yfirburðum, slíkar voru vinsældir hennar og ætli Magni hafi ekki haft svipaðan status eftir Rockstar ævintýrið sitt en núna held ég að þau séu ekki eins gríðarlega vinsæl að þau geti sigrað með svona meðallag.
Sigurlíkur: 5%

In your dreams

Flytjandi og höfundur: Davíð Þorsteinn Olgeirsson
Þetta er alveg hresst og skemmtilegt lag en það vantar einhvern brodd í það. Svolítið skrýtið líka að eina youtube klippan af þessu lagi skuli vera með meinbögguðu hljóði, þ.e. hljóð og mynd passa engan veginn saman. Það segir kannski ýmislegt um að fólk hafi frekar takmarkaðan áhuga á þessu lagi.
Sigurlíkur: 1%

Hvað var það sem þú sást í honum?

Flytjandi: Baggalútur
Höfundur: Magnús Eiríksson
Því miður virðist ekki vera til klippa af sveifluútgáfunni af þessu lagi á Youtube. Mér finnst Baggalútur alger snilld og mér finnst þetta lag mjög flott en það getur varla talist mikið eurovision lag, alla veganna ekki í country útgáfunni og sennilega ekki heldur í sveifluútgáfunni en ég bíð spenntur eftir næstu útgáfu af þessu lagi. Það verður mjög fróðlegt að sjá hvernig það kemur út. Ef sú útgáfa verður vel heppnuð og Ho ho ho verður jafnilla sungið og síðast þá eru alveg ágætislíkur á að mitt atkvæði eigi eftir að lenda á þessu lagi.
Sigurlíkur: 7%

Fullkomið líf / This is my life

Flytjandi: Eurobandið
Höfundur: Örlygur Smári
Það er ekki hægt að segja annað um þetta lag en að þetta sé eurovision lag dauðans. Nú er þetta komið í enn meiri eurovision búning, búið að færa textann yfir á engilsaxnesku og það er enginn annar en sjálfur Páll Óskar sem semur hann og hér er sko dýrt kveðið. Samkvæmt Vísi þá mun lagið verða flutt í þessum búningi á laugardaginn. Það eru eflaust margir eurovisionnördar sem fíla þetta lag en ég er ekki alveg þessi týpíski eurovision nörd því ég fíla ekki alveg svona týpísk eurovision únts únts lög. Það virðist þó alltaf vera eitt svona danslag sem gengur vel í lokakeppninni og hver veit nema þetta lag gæti tekið það sæti því að ekki er komið neitt gott danslag enn þá. Svo er eitt sem maður getur svona nokkurn veginn verið viss um með þetta lag að það verður vel sungið bæði á laugardaginn og úti í Serbíu ef það fer út, annað en hægt er að segja um sum lög í keppninni.
Sigurlíkur: 20%

Hvar ertu nú?

Flytjandi: Dr. Spock
Höfundur: Dr. Gunni
Tissepása.
Sigurlíkur 2%

Ho, ho, ho, we say hey, hey, hey

Flytjandi: Merzedes Club
Höfundur: Barði Jóhannsson
Lagið finnst mér alger snilld og Gillznegger er gargandi snilld á hljómborðinu og massarnir á trommunum líka. Ceres4 er líka góður í sínu hlutverki en eins og staðan er núna eru vandamálin tvö. Fyrsta er að massarnir á trommunum eru ekki nógu kröftugir söngvarar en miðað við það sem maður hefur lesið þá eru þeir í strangri söngþjálfun og þeirra lína er nú ekki mjög flókinn þannig að það er hugsanlegt að það sé hægt að redda því fyrir maí. Hitt vandamálið er stærra og það er stelpan sem er að skottast þarna fyrir framan og að reyna að syngja aðallínuna. Í fyrstu umferð var söngurinn af teipi og þá var þetta allt í lagi en núna síðast var söngurinn live og mæ ó mæ, þvílík hörmung. Ég veit ekki hvort þetta hafi bara verið stress eða hvort hún sé aksjúallí svona slök söngkona en sama hvort er þá á stressið ekki eftir að minnka úti í Serbíu með milljónir að horfa á sig. Ég alla veganna vona að þetta verði allt miklu betra núna á laugardaginn og ef svo er þá er aldrei að vita nema ég kjósi þetta. Ef söngurinn verður örlítið skárri heldur en við síðasta flutning þá tel ég yfirgnæfandi líkur á að þetta verði okkar framlag til eurovision í ár enda er um 90% íslendinga algerlega laglaus og með ekkert tóneyra þannig að það virðist ekki alltaf vera lykilatriði að syngja eitthvað gríðarlega vel. Það virðist skipta meira máli að vera annaðhvort gríðarlega vinsæll eins og Birgitta var 2003 eða nógu fyndinn og sniðugur eins og Silvía Nótt 2006.
Sigurlíkur: 60%

Don’t wake me up

Flytjandi: Ragnheiður Gröndal
Höfundur: Margrét Kristín Sigurðardóttir
Ég fíla Ragnheiði Gröndal og ég fíla þetta lag og sviðsetningin síðast fannst mér mjög smart og held að hafi átt stóran þátt í að þetta lag komst áfram. Það kom mér hins vegar mjög á óvart því ég hélt að þetta lag hefði ekki jafnmikla hylli meðal þjóðarinnar og raun bar vitni. Ég sé verulega eftir laginu hennar Svölu Björgvins en græt það þó engan veginn að þetta hafi farið áfram. Reyndar hefði “Ho, ho, ho, we say hey, hey hey” að sjálfsögðu átt að sitja eftir miðað við performansinn sem þeir buðu upp á en það var aldrei að fara að gerast. Þetta er þriðja lagið sem á möguleika á að fá mitt atkvæði en ég tel sáralitlar líkur á að þetta sé að fara að vinna þessa keppni.
Sigurlíkur: 5%

• Lesa athugasemdir... (6)